Prezıdent Qasym-Jomart Toqaev  Samruk Business Forum otandyq taýar óndirýshilerdi qoldaý forýmynda jekeshelendirýdiń barlyq prosesiniń ashyq ótýine erekshe toqtaldy.

– Jekeshelendirý memlekettik menshikke qatysty bolǵandyqtan azamattarymyz onyń barlyq shartyn bilýge quqyly. Qoǵamdyq baqylaý – jekeshelendirý prosesiniń barlyq kezeńiniń tıimdi ári ashyq ótýiniń pármendi quraly. Úkimet pen qorǵa tıisti tapsyrma berildi. Qordyń iri kompanıalaryna qatysty aıtsaq, "Halyqtyq IPO" arqyly jekeshelendirý óte ózekti bolmaq. Óz qarjysyn tıimdi paıdalanǵysy keletin elimizdiń árbir azamaty ulttyq baılyqtyń bir bóligin ıelenýge múmkindik alýy tıis, – dedi memleket basshysy.

Toqaev taǵy bir mańyzdy másele retinde elimizdiń 2025 jylǵa deıingi ulttyq damý josparynyń maqsat-mindetterine sáıkes "Samuryq-Qazynanyń" basymdyqtaryn keńeıtý máselesine toqtaldy. Qor men portfeldi kompanıalardy damytý jospary osyǵan sáıkes kelýi tıis.

– Qordyń ınvestısıasy da ulttyq ekonomıkaǵa baǵyttalýy úshin ınvest-portfelderdi ártaraptandyrý mańyzdy. Ulttyq ál-aýqat qory óziniń atyna saı bolýy kerek. Meniń buǵan kúmánim joq. El ekonomıkasy úshin qordyń orasan zor mańyzyn eskere otyryp, jalpymemlekettik basymdyqtarǵa qol jetkizý jolynda odan ári dáıekti jumys isteı beredi dep senemin, – dedi ol.

Sondaı-aq forým barysynda "Samuryq-Qazyna" AQ basqarma tóraǵasy Ahmetjan Esimov, "Aq Jol" partıasynyń tóraǵasy Azat Perýashev, Qazaqstan mashına jasaýshylar odaǵynyń tóraǵasy Meıram Pishembaev sóz sóıledi.

Memleket basshysyna ınvestısıalyq bastamalar, qordy ınvestısıalyq holdıńke kezeń-kezeńimen aınaldyrý jumysynyń barysy jáne "Qazaqtelekom" aksıonerlik qoǵamynyń birqatar sıfrlyq jobalary tanystyryldy. Forým qorytyndysy boıynsha birqatar off-teık kelisim-shart pen strategıalyq kelisimge qol qoıyldy.