Иманғали Тасмағамбетовтің қызы Әсел Тасмағамбетова Алматы қаласы, Наурызбай ауданындағы Ақжар ауылында мектеп ашты деп хабарлайды Qamshy.kz ақпарат агенттігі.

 Бұл туралы отандық кәсіпкер Бейбіт Әлібеков өзінің Instagram парақшасында жазған болатын.

 «Осындай тамаша мерекеде досым Әсел мен оның «Сәби» қоры Ақжар ауылының 1200 баласының арманын орындады. Мемлекеттен бір тиын алмай, ол 1200 балаға аумағы 11 625 шаршы метр, 10 блоктан тұратын мектеп- гимназиясын тұрғызды. Әсел мен достары мектепті ауылдың барлық тұрғындарына арнайды және Әкімдік балансына өткізеді. Әсел біздің балаларымыз үшін замануи мектеп тұрғызамын деп барлық процесске баса мән берді»,- деп жазды ол.

«Сондай-ақ, Әсел өз халқының нағыз қызы. Осындай адамдар көп болса, бізге 100 мектеп ме емхана деген бағдарламалар статусы керек емес. Олардың барлығы жинаған дүниелерін өздерімен алып кетпейтінін түсінеді және сол үшін бар күштерін салуда. Бұл мысал көпшілікке үлгі болсын!», - деп жазды Бейбіт Әлібеков.

Айта кетсек, Әсел Иманғалиқызы бұған дейін де Ақтөбеде жетім балаларға арнап үй салып берген еді. 

Сондай-ақ, ол өткен жылы Алматыда Орталық Азия экологиялық зерттеулер институтының жаңа ғимаратын бастаған болатын.

Бұл институт қоршаған ортаны қорғау саласында қызмет көрсетіп, жұмыс істей алатындығы туралы лицензияны 2012 жылы 16 қазанда Қоршаған ортаны қорғау министрлігінен алған. Яғни, ресми түрде 2012 жылы тіркелген. «Орталық Азия экологиялық зерттеулер институты» ЖШС-ның құрылтайшысы - Иманғали Тасмағамбетовтің үлкен қызы - Әсел Тасмағамбетова. 

Әсел Тасмағамбетова - Қазақстандағы танымал кәсіпкер, Кеңес Рақышевтің әйелі, биліктегі аса ықпалды тұлға Иманғали Тасмағамбетовтің үлкен қызы. Екі ұлы бар. «Сәби» жекеменшік қайырымдылық қоры» арқылы қайырымдылықпен айналысады. Бұл қор - жетім балаларға, денсаулығында айтарлықтай кемістігі бар сәбилерге, сондай-мүмкіндігі шектеулі азаматтарға көмек беретін ұйым. Әсел Тасмағамбетова «Орталық Азия экологиялық зерттеулер институты» ЖШС мен «Telli Kazakhstan» компаниясының ресми иесі. «Telli Kazakhstan» компаниясы сұлулық пен денсаулыққа арналған «люкс» класты био-бутиктер желісі. Әсел Тасмағамбетованың суретші сіңілісі (Софья Тасмағамбетова) және бауыры (Нұрсұлтан Тасмағамбетов) бар.