Бүгін қазақ әдебиетінің көрнекті өкілі, классик жазушы Мұхтар Мағауиннің туған күні. Жазушы 75 жасқа толып отыр. "Қамшы" ұжымы жазушыға зор денсаулық тілей отырып, әлеуметтік желілердегі ағайынның қаламгерге деген ыстық ықыластарын жинақтап беруді жөн санады.
Ғалым Боқаш, шығыстанушы:
Бұл адам түркі-қазақ жұртына әдебиетінің ортағасырлық тарихын танытты, көпшіліктің қазіргі тарихи санасына хандық дәуіріне қатысты кеңістік пен уақыт образдарын орнықтырды, совет кезеңінде-ақ шаблоннан шығып "міндетті жағымды кейіпкердің" жағымсыз қылықтары суреттелген көркем шығарма жазды, сөзден эпикалық картиналар салатын жазушылық зор әлеуетінің арқасында көзі тірісінде-ақ оқырмандары классик деп атады, бүгінгі қоғамдық-саяси мәселелер бойынша ақыл мен сезім таразысына дәл тартылған әділ пайғам айтушы анық ақсақалға айналды. Бұл кісіні пост-советтік аласапыран шақтағы дәстүрлі қазақ дүниетанымының діңі дер едім. Мына бір өзім тартқан суретте классик жазушы Мұхтар Мағауин Прагадағы үйіміздің дастарқанынан дәм татқан сайын жасайтын ырымы бойынша жауырын қарап отыр. Құжат бойынша бүгін 75-ке толған (шыны қаңтардың 29-ы екен) бұл ақсақалдай қазақтың болашағына қатысты оптимистік көзқарас ұстанған адамды сирек кездестірдім. Өзі жауырын қараған сайын қазаққа тілейтін барша жақсылықты бүгін Мұхтар атамыздың өзіне арнаймын. Я, Алла тағала, ақсақалдың ғұмыр жасын ұзақ, денсаулығын берік, төрт құбыласын түгел, үш жұртын аман, дос-жаранын бейілді, шабытын шалқар, көңілін орнықты, қаламын қуатты еткейсің!
Айдос Сарым, саясаттанушы:
Бүгін Мұхтар Мағауин ағамыз 75-ке толып жатыр екен. Жүз жасасын кемеңгер ақсақалымыз! Сөзді көпіртпей-ақ қоялық. Ең болмаса Мұхаңның бір дүниесін оқып шығалықшы бүгін. Өз басым "Қазақсыз Қазақстанды" оқуға кеңес берер едім. Басқасын оқимын дегендерге шектеу жоқ. Жазушыға ең үлкен құрмет, ең басты сыйлық - жазғанын оқу, талқылау.Қасым Аманжолұлы, журналист:
Кеше Тұрсынжан Шапай ағамыздың, бүгін Мұхтар Мағауин ақсақалдың туған күні. Әдебиеттегі екі буынның ең үздік шеберлері - қос ағамыздың да дендеріне саулық пен қуат берсін, жазарлары таусылмасын.
Ақберен Елгезек, ақын:
Ауылда Мұхтар Мағауин туралы көп еститінмін. Алматыда Мұхтар деген мықты ағаң бар, кезінде әкең бауыры боп қасында көп жүрді деген секілді сөздер құлағымызда қалып қойыпты.
Ая Өміртай, журналист:
Бүгін , екінші ақпан жазушы атамыз Мұхтар Мағауиннің туған күні. Мерейлі 75 жас. Толқытады, сүйіндіреді, қуантады. Сонымен жазушының жақында ғана "Көкбалақ" романын оқыдым. Оқымадым деуге ұялып жүретін едім. Өнер тағдыры, өміршең ұлт рухы жайлы ауыспалы дәуір кезеңін сипаттайтын шығарма 1978 жылы 25 мамырда басталады. Жазушы бұл кезде отыз сегіз жаста ғана. Араға бір ай салып автор Созақты көруге жолға шығады. Сондағысы "Аласапыран" (Созақтағы кеңес) романын жазу үшін жер бедерін байқастау. Сөйтіп 25 шілдеде қайта жалғасып, қыркүйек айында тәмамдалады. Шығарма қой үстіне бозторғай жұмыртқалаған бейбіт замандағы мамыражай, бейғам сахара жұртының ән мен күйге әуестігін сипаттайды. Сал мен серінің өмір салтымен бетпе бет жүздестіреді. Ақ пен қызылдың соғысынан заман бір мезетте өзгеріп сала беріп, халық қарақан басын күйттеп кеткен уақытта қара домбыра да күмбірінен жаңыла жаздайды. Сондағы заманында дәулескер күйші болған Тоқсоба қарттың жан күйзелісі, немересі кішкене Нәрікті өнерге баулығандағы жанды суреттер легі көз алдымнан шұбатыла өтті. Не керек, шығарма соңы өзге де туындылары тәрізді үмітке сүйене,атар күнмен бірге келеді деп білетін жақсылыққа, ізгілікке сенумен аяқталады. Оқырман алдында ары таза, құрметті жазушының туған күні құтты болсын. Тәңір қуат берсін!
