Қазақстан Президенті Нұрсұлтан Назарбаев Қытай халқын «CCTV-13» арнасына берген сұхбатында жаңа жылдарымен құттықтады, деп жазады Qamshy.kz ақпарат агенттігі.

Қытайда басты арна саналатын «CCTV-13» арнасы Қазақстан Президентінің Қытай халқын жаңа жылмен құттықтаған видеосын жариялады.

Келе жатқан Көктем мерекесі Қытай күнтізбесі бойынша Жаңа жыл болып саналады.

«Қытайдың тату көршісі ретінде Қазақстан халқы қытайлықтарды Жаңа жыл мерекесімен құттықтайды. Барша Қытай халқына тыныштық пен береке, зор денсаулық, бақыт тілеймін. Сонымен қатар, 19-съезде қойылған мақсаттарға мерзімінен бұрын қол жеткізіп, жақсы нәтиже көрсетулерін тілеймін. Екі елдің қарым-қатынасы өте тығыз болғандықтан, Қытай халқының бақыты біз үшін өте маңызды. Алдағы уақытта әлі де көптеген жұмысты бірлесіп атқаратын боламыз», - деп атап өтті Елбасы.

Қазақстан Президенті Қытай халқын ТВ арқылы Жаңа жыл мерекесімен құттықтаған алғашқы шетелдік көшбасшылардың бірі болды.

Еске сала кетейік, Қазақстан Президенті Нұрсұлтан Назарбаев жұма күні Қытайдың «CCTV-13» арнасына сұхбат берген болатын.