Алатау ауданында мектеп оқушылары арасында халқымыздың інжу-маржаны, дәстүрлі өнерге қолдау көрсетіліп, көне өнер төрге озды. Дәл бүгінгі даңғаза, тарс-тұрс музыка сахнаны жаулаған тұста дәстүрлі өнерімізге насихат керек-ақ. Олай дейтін себебіміз, онсыз да жылт еткенге қызығып, әу дегенді ән деп қабылдайтын жастарға дұрыс бағыт беріп, ұлттық өнерге бет бұрғызбасақ күні ертең бұл күнімізге зар болмасымызға кім кепіл?

Сондықтан қазағы қалың, ұлттық дәс­түрді қадірлей білетін Алатау ауданы көпке үлгі болатындай сауапты істі қолға алып отыр. «Нұр Отан» партиясы Алатау аудан­дық филиалы «Dastur» жобасы аясында дәстүрлі ән орындаушылар бай­қауын өт­кізіп, оған 12 мектептің үміткер­лері қатыс­қан еді. Халық әнінің кере­меттігі осында болса керек. Үміткер­лердің бірі домбырамен әнді әуелетсе, енді бірі оркестрдің сүйе­мелдеуімен шалқыта салды. Осылайша Шырын Зейнуллаева басшылық етіп отырған №149 білім шаңыраған әсем әуен кернеп, ұлттық рух  қалықтады.

Құрамында «Алматы ақшамы» газе­тінің Бас редакторы, қалалық мәс­лихат депутаты Қали Сәрсенбай, дәстүрлі әнші Алма Аманжолова бар әділқазылар алқасына жеңімпазды анықтау оңайға соққан жоқ.

– Дәл қазіргідей кезеңде ұлттық өнерге қолдау ауадай қажет. Сондықтан саф өнерді жастар арасында насихат­тап, осын­дай байқаулар өткізіп отырсақ дәстүрлі өнердің тамырына қан жүгірер еді. Бүгінгі мектеп оқушылары ертеңгі еліміздің үмітін ақтар болашақтары. Әнге, өнерге деген қызығу­шылықтарына риза болып отырмын, – деген Қали Қош­қар­ұлы бұл байқаудың үрдіске айналатынын жеткізді. Белгілі қаламгер өз атынан мектепке 50 кітап сыйға тартты.

– Дәстүрлі өнерді дәріптейік. Ораза айында әділқазы болу да оңай емес. Барлық өнерді құрметтеген баланы жеңімпаз деп айтар едім, – дейді Алма Аманжолова.

Сонымен, «жүзден жүйрік, мыңнан тұлпар» шыққан байқау жеңімпаздарының есімдері де белгілі болды. Бірінші орынды №180 мектептің 10-сынып оқушысы Сұлтан Шадат Кенен Әзірбаевтың «Баста өлең» әнімен жеңіп алса, екінші орынға №154 мектептің 6-сынып оқушысы Абсамат Сырым «Жорғатай» әнімен лайық деп танылды. Байқаудың үшінші орны №179 мектептің 10-сынып оқушысы «Сәулем-ай» әнін орындаған Гүлсезім Қарымсақоваға бұйырды.

Барлық жеңімпаздарға бағалы сый­лықтар табыс етілді. Қорытынды сөз сөйлеген «Нұр Отан» партиясы Алатау аудандық филиалы төрағасының бірінші орынбасары М.Алмасаев жобаның маңыз­дылығын айта келе, дәстүрлі өнерге құрмет әлі де жалғасатынын жеткізді.