Дінімізде «үйдегі тазалықты ең лас жерден бастау керек» делінеді.  Ең лас жердің әжетхана екені белгілі. Біз керісінше алдымен төрді тазалаймыз. Еліміздің түкпір-түкпіріндегі  қоғамдық әжетханалардың қандай күйде екендігі бүгінде  бүкіл әлемге әшкере болған десек болады. Шетелдіктерден де ұялмайтын жағдайға жеттік.

Көршілес өзбек елі осының емін тауыпты. 2018 жылы салынған 50 қоғамдық әжетхана Мемкомтуризмнің әжетхана тұрғызғандарға  салық жеңілдіктері жасалатыны жөніндегі  SMS-хабарламасы арқылы іске асқан көрінеді.

Былтыр өзбек елінде 462 санитарлық-гигиеналық әжетхана қолданысқа беріліпті. Осылайша Өзбекстан туристердің қоғамдық әжетханаға байланысты наразылықтарын ескеріп, оны сәтімен жүзеге асырған. Осылайша ала тақиялы ағайын 2025 жылдың 1 қаңтарына дейін жыл сайын 12 миллион сумды (1430 $) гигиена талаптарына сай қоғамдық әжетхана салғандарға бөліп отырмақ. Ол қаржының ішіне  коммуналдық шығындар, тазалықшының жалақысы, тазалағыш заттар да кіреді. Сондай-ақ туристерге жақын маңдағы әжетхананы табуға көмектесетін арнайы мобильдік қосымша да енгізілмек. Ташкенттен үйреніп,  бізге де туризмді туалеттен бастаған дұрыс-ау!