«Нұр Отан» партиясының кезекті XVIII съезінде Бас партияның логотипі жаңарды. Жаңа логотипті партия төрағасының бірінші орынбасары Мәулен Әшімбаев таныстырды. Ұсынылып отырған логотипте күннің 17 сәулесі бейнеленген. Қазақ тілінің латын әліпбиіне көшуіне байланысты партия атауы латын әрпімен жазылған. Партия төрағасының бірінші орынбасары логотип туралы былай деп түсіндіріп өтті.

«Соңғы бес жылдың ішінде заңнамалық өзгерістер мен жаңа тәжірибелерге сәйкес, партия жарғысына кейбір нормаларды енгізу қажеттігі туындап отыр. Ең алдымен, қазақ тілінің латын әліпбиіне көшуіне байланысты партияның мемлекеттік тілдегі атауында латын әріптерін қолдану ұсынылуда. Экраннан партияның жаңартылған логотипін көрулеріңізге болады. Ұсынылып отырған логотипте күннің 17 сәулесі бейнеленген. Ол біздің облыстарымыз бен Алматы, Шымкент, Астана қалаларын символикалық тұрғыда бейнелейді. Осы ретте партияның латын әліпбиіндегі атауын - Партия Төрағасының өз қолымен жазғанын атап өткім келеді».