«Ұшақ апаты болған жерде апаттық-құтқару жұмыстары аяқталды». Бұл туралы Алматы қалалық Төтенше жағдай департаменті басшысы Ерлан Әлібеков мәлім етті деп жазады Qamshy.kz ақпарат агенттігі. 

–Қазір құтқару жұмыстарына қатысты барлық жұмыс аяқталды, Ұшақта ешкім қалған жоқ,– деп мәлімдеді Ерлан Әлімбеков.

Оның айтуына қарағанда, апат орын алған жерде қандай да бір өрт шығу дерегі байқалмаған. 

Құтқару жұмыстарына 776 азамат қатысты, 119 техника көмекке келді. Алматы қаласынан 35 жедел-жәрдем бригадасы, Алматы облысынан 16 жедел жәрдем көлігі, сонымен қатар 116 медициналық қызметкерлер апат аймағындағы зардап шеккендерге көмекке келді.

Ерлан Әлібековтың дерегіне қарағанда, 15 адам қайтыс болған, 66 адам зардап шеккен, оның ішінде 50-і ауруханаға жатқызылды, 12 адам әлі де ауыр халде көрінеді. 

...Qamshy.kz ақпарат агенттігі ұшақ апатынан қаза тапқандарға көңіл айтып, зардап шеккендердің тезірек сауығып кетуін тілейді.