Дәрігерлер қазақстандық әйелдерге пандемия аяқталғанша балалы болу жоспарын шегеруді ұсынды. Пандемия кезінде жүкті әйелдердің өлім көрсеткіші төрт есе өскен, деп хабарлайды Qamshy.kz ақпарат агенттігі «Астана» телеарнасына сілтеме жасап.    

Тоғыз айда Қазақстанда 136 жүкті әйел қайтыс болды. 2019 жылмен салыстырғанда биыл өлім көрсеткіші 100 адамға көп. Пандемия кезінде көмек уақытылы көрсетілмегендіктен  өлім көрсеткіші күрт өскен.

Сарапшылар коронавирустың екінші толқынында жағдай қайталануы мүмкін деп болжайды. Дәрігерлер қателікті қайталамауы үшін коронавирус жұқтырған жүкті әйелдерді емдеудің тәсілдерін пысықтауда. Қазіргі таңда Қазақстанда бес мың жүкті әйелде коронавирус инфекциясы бар екені анықталған.