Батыс Қазақстан облысы Чапаев-Жаңақала-Сайхин автожолында жол апаты болып, төрт адам көз жұмды. Бұл туралы облыстық полиция департаменті хабарлады.

Қайғылы оқиға 1 шілде күні, сағат 21:00 шамасында болған. Чапаев-Жаңақала-Сайхин  автожолында Лада Гранта көлігінің жүргізушісі Оралдан, оған қарсы бағытта ВАЗ-2107 автокөлігі келе жатады. Бір мезетте Лада көлігінің жүргізушісі рульді басқара алмай, қарсы жолаққа шығып ВАЗ-2107 автокөлігімен соқтығысқан. 

Салдарынан төрт адам, оның ішінде жеті жасар бала қайтыс болды. Тағы сегіз адам жарақат алды.

Қазір аталған іс бойынша қылмыстық кодекстің 345-бабы, 4-тармағы бойынша (Абайсызда екi немесе одан да көп адамның өлiмiне әкеп соққан, жол қозғалысы ережелерін бұзу) сотқа дейінгі тергеу басталды. Оқиғаның мән-жайы мен себептері анықталып жатыр.