Германия канцлері Ангела Меркель аймақ басшыларымен Ковид дағдарысы жөніндегі кездесу алдында  "драмалық" төртінші Ковид толқыны келе жатқанын айтты.

Сәрсенбіде Германияда күнделікті вирус жұқтыру саны 52826-ға жетіп, жаңа рекорд тіркелді.

Ал Бельгия локдаун болдырмау үшін бірқатар шараларды жариялады.

"Барлық дабыл сигналдары қызыл" деді премьер-министр Александр Де Кро. Ол адамдарға жеке байланыстарды шектеуді айтты.

"Еуропа картасы тез қызылға айналады, біз де солаймыз" деді ол.

Бельгияда балалар  қазіргі шаралар бойынша 12 жастан емес, 10 жастан бастап маска киюге міндеттелмек. Сенбіден бастап аптасына төрт күн үйде жұмыс істеу енгізілмек. Театрларда, кинотеатрларда және мұражайларда "Covid Safe" билеттері деп аталатын билеттер қажет болады.

Үшінші екпе 2022 жылдың сәуір айының соңына қарай барлық бельгиялықтар үшін енгізіледі.

Дүйсенбіде екпе алмаған екі миллионға жуық адамға тосқауыл қойған Австрия сәрсенбіде күнделікті инфекциялардың рекордтық көрсеткіші туралы хабарлады. Рекордтық жағдайлар туралы хабарлаған Нидерланды ішінара локдаун енгізді.

Швеция 1 желтоқсаннан бастап алғаш рет 100-ден астам адам қатысатын концерттер мен басқа да жабық іс-шаралар үшін Ковидке қарсы вакцинация билетін енгізеді. "Вакцинацияланбағандар әдеттегідей жүре алмайды; сіздің ең маңызды үлесіңіз - вакцинациялану" деді шараны қабылдаған әлеуметтік істер министрі Лена Халленгрен. Дегенмен ол Швеция әлемнің басқа елдерінен оқшауланбағанын айтты.

Чехияның премьер-министрі Андрей Бабис вакцина салдырмаған кез келген адамға қоғамдық іс-шараларға немесе қызметтерге кіруге тыйым салынатынын айтты. Дүйсенбіден бастап теріс сынақтар бұдан былай жеткіліксіз болады.

Сәрсенбіде рекордтық 8,342 жағдай тіркелген көршілес Словакия осындай шараларды жоспарлап отыр: "Жұмыс орындары мен маңызды емес дүкендер тек вакцинацияланған қызметкерлерге немесе сауығып кеткенін дәлелдей алатын адамдарға ғана қол жетімді болады" дейді премьер-министр Эдуард Хегер.

Вакцинация деңгейі континентте әртүрлі. Словакияның вакцина қабылдау деңгейі ең төмен болып, 44%-ды құрады. Бұл Чехияда 58%, Австрияда 65% және Германияда 68%.