Ержан Бабақұмаров Алматы қаласы әкімінің орынбасары лауазымынан босатылды. Бұл туралы НЕХабар телеграм каналы хабарлады.

Аталған қызметке ол 2019 жылдың шілдесінде тағайындалған.

Бабақұмаров Ержан Жалбақұлы 1969 жылы 2 наурызда Талдықорған облысында туған. 1991 жылы Әл-Фараби атындағы ҚазҰУ "саясат тарихының оқытушысы" мамандығы бойынша бітірген.

Әр жылдары Қазақстан даму институтында, Алматы қаласы әкім аппаратында, президент әкімшілігінде, мәдениет және ақпарат министрлігінде, премьер-министр кеңсесінде істеген.

2012-2016 жылдары президент жанындағы орталық коммуникациялар қызметінің директоры, 2019 жылы президент Қасым-Жомарт Тоқаевтың кеңесшісі болған.

Ол Алматының экс-әкімі Бақытжан Сағынтаевтың орынбасары бола жүріп, идология саласына жауапты болған.

Кеше Бақытжан Сағынтаев қызметінен кетіп, оның орнына Алматы қаласының әкімі болып Ерболат Досаев тағайындалған.