Ресей президентінің баспасөз хатшысы Дмитрий Песков Кремль Қазақстан президенті Қ.Тоқаевтың Каспий құбыр желісі консорциумы жұмысы тоқтағаннан кейін, экспорттың балама маршрутын дамытуды тапсыруынан саяси астар көрмейтінін мәлім етті. Бұл туралы ол kommersant.ru басылымына айтты.

5 шілдеде Ресейдің Новороссийск соты экологиялық бұзушылықтарға байланысты Қазақстан мұнайын экспорттайтын негізгі бағыт КҚК-нің жұмысын 1 айға тоқтату туралы шешім қабылдаған.

Осыған орай бүгін Қазақстан президенті көлік-транзит әлеуетін дамыту жөніндегі кеңесте мұнай тасымалдау желілерін әртараптандыру мәселесінің маңызына тоқталып, ҚазМұнайГаз" ұлттық компаниясына оны жүзеге асыру мәселесін қарастыруды тапсырған.

– Транскаспий бағдары басым бағыт саналады. "ҚазМұнайГазға" оны жүзеге асырудың оңтайлы нұсқасын, соның ішінде Теңіз жобасының инвесторларын тарту мүмкіндігін пысықтауды тапсырамын. Үкімет "Самұрық-Қазынамен" бірлесіп, Атырау – Кеңқияқ және Кеңқияқ – Құмкөл мұнай құбырларының қуатын арттыру жөнінде шаралар қабылдауы қажет, – деді Тоқаев жиында.