Сонымен, Қытай коммунистік партиясының XX съезі басталды, күмән жоқ, бұл көршіміздің саяси өміріндегі елеулі оқиға... Дәстүр бойынша, ҚКП ОК-нің Бас хатшысы Си Цзиньпин ОК атынан өткен бес жылдағы жұмыстан есеп берді...
Қол жеткен нәтижелерді қорытындылап, алдағы бес жылдың межесін айқындады. Жалпы, ұлт және дін саясаты өзгеріссіз қалады – Біртұтас қытай ұлтын қалыптастыру және діндерді қытайландыру мен социалистік қоғамға бейімдеу жалғасады, мемлекеттің азаматтар өміріне араласуы үдей түседі – қоғам мүшелеріне коммунистік этикалық тәрбие күшейтіледі, Халық тұрмысы жақсартылады – жұмыспен қамту басым бағытқа айналады (елде жұмыссыздықтың өскенін жанама түрде мойындады).
Тайвань мәселесіне байланысты қару қолданудан бас тартпайтынын қайталай мәлімдеді, бұл Си-дің бұрыннан бері айтып келе жатқан ұстанымы, дегенмен, осынша биік мінберден, партия съезінде айтылуы, мен үшін күтпеген жаңалық болды, алдағы бес жылда Тайвань бұғазындағы жағдай онан сайын ушығуы мүмкін.
Партияның армияға билігі күшейеді, осы мақсатта армияны құдіреттендіру бойынша нұсқаулар айтылып, соғысқа сақадай сай болу жөнінде тапсырма берілді.
Айтпақшы, жемқорлықпен күресте басым жеңіске қол жеткенін атап өткен Си Қытайдың тарихи цикіліне жол бермеудің екінші тәсілін тапқанын ауызға алды. Алғашқы тәсілді, әрине, Мао Цзэдун тапқан деп саналады, осы жерде Си-дің өзін екінші Мао ретінде көрсеткісі келетіні анық байқалды.
Си-дің билігі тағы да бес жылға жалғасатыны белгілі болды, партия жарғысына тағы да өзгету енгізілмек. Дегенмен, съездің дәл қарсаңында Бейжіңде Си-дің биліктен кетуін талап етіп, көрнекті көпірлердің біріне плакат ілінуі саяси күрестердің ушыға түсетінін, халық наразылығының аяқ астынан бұрқ ете түсуі мүмкін екенін көрсетті.
Ерлан Мазан
Xinjiang үниверситетінің түлегі
facebook парақшасынан
