Қазақстан экономиканың құлдырауына әсер ететін сыртқы факторларға қарамастан, жүргізіп отырған институттық реформалар мен қуатты макроэкономика­лық саясаттың арқасында жаһандық бәсекеге қабілеттілік рейтингінде 42-ші орынға қол жеткізді. Кеше Президент жанындағы Орталық коммуникациялар қызметінде өткен баспасөз конференциясында «Назарбаев Университеттің» президенті Шигео Катсу осылай деп мәлімдеді.
«Жаһандық бәсекеге қа­бі­леттілік рейтингінде Қазақ­стан­ның 42-ші орынға көтері­луімен құттықтаймын. Бұл үлкен жетістік. 2008 жылғы дағ­дарыстан кейін қиын кезең болды. Ал қазіргі таңда саяси бастамалардың арқасында біраз көрсеткіштер бойынша ілгерілеушілікке қол жеткізілді. Қазақ­станның дамуы мен бәсе­кеге қабілеттілігін арттыруда елдің макроэкономикалық сая­сатының әрдайым қуатты болуы негізгі рөл атқарды», деді «На­зарбаев Университеттің» пре­зиденті.
Сонымен қатар, Шигео Кат­су Қазақстанды жаһандық бәсекеге қабілеттілік рейтингінде одан әрі ілгерілетуде Елбасының ұсынған бес институттық реформасы мен оны жүзеге асыру бойынша қабылданған Ұлт жос­парындағы «100 нақты қадам­ның» маңыздылығын атап өтті.
«Қазіргі таңда экономиканың дамуына кері әсерін тигізетін сыртқы факторлар жетерлік. Өңірдегі тұрақсыздық, Таяу Шы­ғыстағы қақтығыстар мен әлемді жайлап бара жатқан дағдарыс кезінде ұсынылған бұл реформалар ел алдында тұрған өткір әрі маңызды мәселелерді шешуге бағытталған. Осы бастамаларға үлкен мән беріп, оны жүзеге асыруға барлығымыз атсалысуы­мыз қажет», деді ол.
Естеріңізге сала кетсек, Дү­ниежүзілік экономикалық форум 2015-2016 жылдарға арналған жаһандық бәсекеге қабілеттілік жөніндегі есебін жариялаған болатын. Оған сәйкес, Қазақстан әлемнің 140 елі арасында 42-орынды иеленіп, өткен жылмен салыстырғанда сегіз сатыға жоғарылады.
Аталған рейтинг бойын­ша, биыл еліміз Италия мен Польшаның ортасына жай­ғасты. Сөйтіп, Ресей, Латвия, Фил­иппин және Түркия сынды ел­дерді артта қалдырды. Ал бірінші орынға осымен жеті жыл қатарынан Швейцария ие болып отыр. Екінші орынды Сингапур сақтап қалды. АҚШ үшінші орын­ға орнықса, Германия бесін­ші сатыдан төртіншіге көте­рілді. Ал Нидерланд бесінші орынды иеленді.
Айта кетейік, бұл рейтингте 2013 және 2014 жылдардың нәтижелері бойынша Қазақстан екі жыл қатарынан 50-орынға тұрақтаған болатын. Жаһандық бәсекеге қабілеттілік рейтингі инфрақұрылым, макроэкономика, денсаулық сақтау, инновация сынды салаларды қамтыған 110-нан аса көрсеткіш негізінде жасалады.

"Қамшы "сілтейді

Дереккөз: "Егемен Қазақстан"