Парламент Сенаты Экономика және қаржы комитетінің кеңейтілген отырысында «Мемлекеттік аудит және қаржылық бақылау туралы» заң жобасы қаралды, деп хабарлады осы палатаның баспасөз қызметі.

Заң жобасы Мемлекет басшысының бес институттық реформасын іске асыру жөніндегі 100 нақты қадам – Ұлт жоспарын орындау аясында әзірленген болатын.

Ұлт жоспарының «Аудиттің жаңа жүйе­сін енгізу және мемлекеттік аппа­раттың жұмысын бағалау» жөніндегі 93-қа­дамына сәйкес, аудит жүйесін жаңғырту «Есеп комитеті бірінші сыныпты әлемдік ауди­торлық компаниялар үлгісімен жұмыс істейтін болады және ағымдағы опера­ция­лық бақылаудан шығарылуын» көздейді.

Қабылданатын заңның ережелері аудитті халықаралық стандарттарға көшіруді қарастырады. Құжат Республикалық бюд­жеттің атқарылуын бақылау жөніндегі есеп комитетінің өкілеттігін кеңейтеді. Атап айтқанда, Есеп комитеті республикалық бюд­жет жобасын алдын ала бағалау, жи­нақталған қаржылық есеп берудің (респуб­лика деңгейінде) жыл сайынғы аудитін іске асыру, мемлекеттік қарызды қалыптастыру және басқару, еліміздің Ұлттық банкінің аудиті секілді жаңа міндеттерге ие болады.

Есеп комитетіне, сондай-ақ, қаржы-эко­номика саласындағы ұлттық қауіп­сіздікті анықтау, талдау, бағалау және болжау жөніндегі өкілеттіктер де беріледі.

Жоба мемлекеттік аудит және қаржылық бақылау саласындағы Үкіметтің құзыретін белгілейді. Мемлекеттік аудит және қаржылық бақылаудың бірыңғай деректер базасын құру көзделіп отыр, ол уәкілетті органдардың өзара іс-қимылын жақсартады және тексерулерді азайтады.

Кейіннен аттестациялаудан өте­тін мемлекеттік аудиторларды серти­фи­кат­тау­дың тәуелсіз жүйесін енгізу қарас­тырылуда.

Сондай-ақ, «Қазақстан Респуб­ли­касының кейбір заңнамалық актілеріне мемлекеттік аудит және қаржылық бақылау мәселелері бойынша өзгерістер мен толықтырулар енгізу туралы» заң жобасы да қаралды. Заң жо­басы мемлекеттік бюджет қаржысын пай­далану барысында әкімшілік құқық бұзу­шы­лық орын алған жағдайда мем­ле­кет­тік ау­дит және қаржылық бақылау орган­дары­на әрекет ету саласына өкілеттіктер береді.

«Мемлекеттік аудит және қаржылық ба­қылау туралы» жаңа заң әзірленуіне бай­ланысты мемлекеттік қаржы бақылау мәселелерін реттейтін бірқатар заңнамалық актілерге өзгерістер енгізіледі. Парламентте Есеп комитетінің құқықтарын жүзеге асыруға бағытталған ережелер белгіленеді.

Заң жобалары палатаның қарауына жіберілді.

Дерккөз: Егемен Қазақстан