«100 нақты қадам» Ұлт жоспары және «Болашағы біртұтас ұлт» бес институттық реформасының стратегиялық міндеттерін орындау мақсатында кейбір заңнамалық актілерге мәдениет және тарихи-мәдени мұра мәселелері бойынша өзгерістер мен толықтырулар енгізу туралы заң қабылданған еді. Заңнамаларға енгізілген мәдениет саласындағы өзгерістер туралы кеше Орталық коммуникациялар қызметінде өткен брифингте айтылды.

Брифингке Мәдениет және спорт вице-министрі Ға­лым Ахмедияров, аталған министр­ліктің Мәдениет және өнер істері департаменті директорының орынбасары Күміс Сейітова, Астана циркінің бас директоры Ерік Жолжақсынов қатысты.

28 қазанда «100 нақты қадам» Ұлт жоспары аясында «Қазақстан Республикасының кейбір заңна­малық актілеріне мәдениет және тарихи-мәдени мұра мәселелері бойынша өзгерістер мен толық­тырулар енгізу туралы» Заң қа­былданған болатын. Жаңа түзе­тулер, сонымен қоса, осы саладағы бақылауды жетілдіруге бағытталған еді.

«Жаңа заң қабылданғанға дейін музей директорлары экспонаттарды қалай қолдануға болатындығын, нені сатып алып, нені басқа мұражайларға беру керектігін өздері жеке шешкен болатын. Енді онымен арнайы кәсіби комиссия айналысады», – деді Ғ.Ахмедияров. Оның атап өтуінше, құқықтық, экономикалық, әлеуметтік және ұйымдастырушылық негіздерді анықтау және ел мәдениетін жаңғырту, сақтау, дамыту, тарату және қолдану саласындағы мемлекеттік саясат, ең алдымен, заңнамалық базаның кешенді сарапталуы мен жетілдірілуін қамтамасыз етуді талап етеді.

«Сонымен қатар, мәдениет са­ласындағы заңнаманы жетіл­діру бірқатар заңнаманың, нор­­мативтік-құқықтық акті­лер­ді әзірлеп, бе­кі­тетін өкі­летті орган­дардың құзыретін жетіл­­діруді болжайды», – деді спикер. МСМ өкілі­нің пікірінше, бұл қор­ларды толықтыру бары­сын мейлінше ашық, ал экспозиция­ларды келу­ші қонақтар үшін ана­ғұрлым тартымды етеді.

Ал брифинг барысында сөз алған К.Сейітова: «Егер бұ­рын заңнама негізінде қазба жұ­мыс­тары кезінде табылған заттарды мұражайларға беру айқындалса, енді тиісті рәсімдер де бар. Бұл мәдени құндылықты тап­қан адамдарға оларды тапсы­рудан жалтаруға мүмкіндік бермейді», – деді.

Сонымен бірге, цирк өнеріне де өзгерістер енгізіліпті. Бұрын театрлар, филармониялар мен мәдени-ойын-сауық ұйымдарына арналған «Мемлекеттік сатып алулар туралы» Заңмен сахналық костюмдер сияқты кейбір тау­ар­лар мен қызметтерді конкурссыз сатып алуға рұқсат беретін норма болатын. Алайда, бұл тізімде цирк­тер жоқ-тын, сондықтан кейбір қиыншылықтар туындайтын. Осы мәселені шешу үшін мемлекеттік сатып алулар заңнамасына тиісті түзетулер енгізілді», – деді Е.Жолжақсынов.

Заңның мақсаты – тарихи-мәдени мұра, цирк және театр­алдық өнер, мұражай және кітап­хана ісі, сонымен қатар, мұрағат ісі бойынша қолданыстағы заңнаманы жетілдіру болып табылады екен. Сонымен қоса, заң нормалары Қазақстан Рес­публикасының Мәдени сая­саты тұжырымдамасында көрсе­тілген саланың институттық жаңғыруы, басқарушылық шешімдерді үйлестіру, заманауи мәдени клас­тер­лерді құру, салалық көр­кем­дік кеңестерге байланысты мақ­сат­тарын жүзеге асыруға бағыт­талыпты.

Заң жобасын дайындау барысында мәдениет және тарихи-мәдени мұра саласындағы мәселелерді нормативтік реттеу бойынша халықаралық, соның ішінде ТМД елдерінің тәжірибесі қолданылыпты.

Дереккөз: "Егемен Қазақстан"