Сонымен, тоқсаныншы жылдардың басында КСРО делінген алып мемлекетке жетпіс жылдан астам уақыт бойы гегемондық жасап келген КОКП-ның дәмі таусылды. Өз уақыты әбден пісіп-жетілгенде Қазақстан да өз тәуелсіздігіне ие болды. Компартия келмеске кетті. Ендігі жерде жаңа басқару құрылымы қандай болмақ? Көп кешікпей егемен елдің тізгіні президенттік басқару жүйесіне көшетіні белгілі болды. Сөйтіп, 1991 жылдың аяқ кезінде елімізде тұңғыш рет президенттік сайлау өткізіліп, осы жоғары лауазымға Нұрсұлтан Назарбаев сайланды.

Ал республикадағы облыс­тар мен қалаларды және аудандарды басқару үшін әкім­дік басқару институты енгізіл­ді. Бұл үрдіс 1991 жылдың 16 жел­­тоқ­­санындағы тәуелсіздік жарияланған күннен кейін көп кешікпей іле-шала басталды. Ең алдымен облыс, содан соң қала, аудан әкімдері тағайындалды. Келесі 1992 жылдың ақпан айында әкімдік атты жаңа басқару инс­титуты толығымен жасақталып үлгергеніне куә бола аламын. Өйткені, солардың бірі өзім едім. Мен сол 1992 жылдың 24 ақпаны күні Жаңақала ауданының әкімі болып бекітілдім. Осы қызметті бір ауданда үздіксіз 18 жыл бойы атқарып, өз өтінішім бойынша құрметті еңбек демалысына шық­тым.

Ең басты айтайын дегенім, осы жылдардың бәрінде Тұң­ғыш Пре­зиденттің аудандық буындағы өкілі ретінде Нұр­сұл­тан Әбіш­ұлының жол және жөн көрсетуімен ел алдындағы жауапкершілікті тең көтеруге тырысқаным дей аламын. Тағы бір айта кетер мәселе – 90-шы жылдардың бас кезінде Жаңақала ауданында төтенше табиғи жағ­­дай орын алды. Күз айларында үздіксіз селдете жауған жаңбырдың салдарынан аудан аумағындағы Мәштексай, Айдархан және Жаңақазан ауыл­­­да­рындағы тас балшықтан соғылып салынған үйлердің төбесі опырылып құлай бастады. Тұрғындарға уақытша бас­пана тауып берудің өзі қиынға түсті. Осындай қысылтаяң кезде Қа­мыс Самар еліне респуб­лика басшысы шұғыл сапармен келіп, тығырыққа тірелген істің жай-күйімен танысты. Н.Ә.Назарбаев Алматыға орал­ғаннан кейін көп кешікпей бізге қуанышты хабар келіп жетті. Үкіметтен жаңа үй са­луға қажетті қаражат бөлініп, мезгілдің қолай­сыз болғанына қарамастан, шаға­ладай сәнді үй құрылыстары басталып кетті.

Сол жылы аталған ауылдарда артық-кемі жоқ 200 тұрғын үй тұрғызылды. Сондағы ел-жұрттың көл-көсір қуанышы, Нұрсұлтан Әбішұлының атына білдірген шексіз ризашылықтары мен алғыстары әлі есімнен кет­пейді. Үлкен кісінің тигізген шапағаты деген дәл осындай-ақ болар.

Егемендіктің елең-алаңында біздерді Алматыға активке шақы­рып жинаған кезінде де, елге келген сапарларында да Нұр-ағаң ең алдымен, ел-жұрттың жай-күйін сұрауды еш ұмытпайтын. Аты-жөнімді атап: «Төлеген, алдымен сен айтшы, ел не деп жатыр? Халық біздің қолға алған реформаларымызды дұрыс бағалап отыр ма? Сіздер ауылдағы аға­йын­­да­ры­мызға бұл өтпелі, уа­қыт­ша қиындық екенін менің атымнан жақсылап түсіндіріп айтыңыздар. Тәуелсіздік пен дербес ел болудың жолы ешқашан да жеңіл болмаған. Осыны ұғын­дырыңыздар. Сіздер мен біздерді күтіп тұрған іс көп. Оны біз істемегенде, кім істейді. Ата-бабаларымыз ғұмыр бойы тәуелсіздікті аңсап, осы жолда бел шешпей күресіп өтті емес пе? Соған қол жеткізе білген біз бақытты ұрпақпыз. Енді осы тә­­уелсіздігімізді уысымыздан шығарып алмау үшін қолдан кел­ген­нің барлығын жасауға тиіспіз. Артқа қарай жол жоқ. Тек қана алға ұмтылуымыз керек», – дейтін.

Осыдан-ақ біз Нұрсұлтан Әбішұлының жүрегі қашанда ел, жер деп соғатынын аңға­рып, байқап қалушы едік. Тәуел­сіздіктің алғашқы жылдарынан жас мемлекеттің жаңа басшысы «әрқайсымыз елге адал, жанашырлықпен және терең патриоттық сезіммен қызмет жасай білуіміз қажет» дейтін. Ең бастысы – бүгінде Тұңғыш Президентіміз сөз бен істің бір­лігін тығыз ұштастыра білген әлем­дік деңгейдегі тұлға ретінде танылғаны бәріміз үшін үлкен мақтаныш, үлкен мерей. Жақсы адам елдің бағы үшін дүниеге келеді дегендей, мен Тұңғыш Президентімізді Қазақстан хал­қын бақ пен бақытқа бастай біл­ген қайталанбас тұлға деп түсінемін.

Дереккөз: Егемен Қазақстан