Алаш көсемі Әлихан Бөкейханның 150 жылдығы ЮНЕСКО көлемінде тойланатын болды. Бұл туралы ЮНЕСКО-ның 18 қарашада Парижде аяқталған Бас конференциясының 38-ші сессиясында мәлім болды, деп хабарлайды «Қамшы» порталы ҚазАқпаратқа сілтеме жасап.

Сүйінші хабарды алаштанушы ғалым Сұлтанхан Аққұлұлы Жүсіп хабарлады, деп жазады «Түркістан» газеті.

Әлихан Нұрмұхамедұлы Бөкейхан (05.03.1866 жыл, Қарқаралы уезі, Семей облысы, Дала өлкесі - 27.09.1937 жыл, Мәскеу) - XIX ғ. соңы мен XX ғ. басындағы қазақ зиялыларының, қоғам және мемлекет қайраткерлері қатарындағы аса ерекше тұлға. Көрнекті қоғам және мемлекет қайраткері, ұлт-азаттық және Алаш қозғалысының жетекшісі, Алашорда автономиялы үкіметінің тұңғыш төрағасы, публицист, ғалым, аудармашы.