Almaty men onyń aınalasyndaǵy aýdan turǵyndary zań boıynsha árbir azamatqa berilýi tıis 10 sotyq jer máselesin taǵy kóterip otyr, - dep habarlaıdy Qamshy.kz 31-arnaǵa silteme jasap.
Zań boıynsha árbir azamatqa berilýi tıis tegin 10 júzdik jer alýdan úmitti halyq taǵy jınaldy. Bul joly turǵyndar Almatynyń Alataý aýdanynda bas qosyp, jerdiń naqty qaı jerden beriletinin surady. Eń qyzyǵy, ákimdiktegiler jer alýǵa ótinishterdiń barlyǵyn qabyldap, ár ótinish berýshige 10 kúnniń ishinde «jer joq» degen jaýapty qaıtaramyz dedi.
Almatyda kún qaınap tur. "Jer beriledi" degenge elikken halyqtyń temperatýrasy da odan esh tómen emes. Sondyqtan, olardy sabyrǵa shaqyrý qıyn.
Jurt sasatyn syńaı tanytpady, kerek bolsa polısıa men omonnyń ıtergenine de tótep berýge daıyn. Kerisinshe kostúm kıip kóp arasynan kózge túsken shendilerden maza qashty. Sondyqtan olar jınalǵan halyqty tarqatýǵa kiristi.
NURLAN SYDYQOV, Almaty qalasy ishki ister saıasaty basqarmasynyń qyzmetkeri:
- Sizderge jaǵdaı jasap, arnaıy mine avtobýstar qoıylyp otyr. Osy avtobýstarǵa otyryp qazir Jetisý aýdanyndaǵy , Qulager yqsham aýdanyndaǵy Sonǵa baryńyzdar. Onda eshqandaı kezek joq. Sol jerge baryp ótishterińizdi qaldyryńyzdar.
Áıtse de áleýmet ákimdiktegilerdiń ǵajap meıirbandyǵyna asa qulaq aspady. Halyqqa qyzmet kórsetý ortalyǵyn qorshaýǵa alyp, ishke basyp kirýge talpyndy. Biraq bul joly jer komısıasynyń músheleri jaǵdaıdy egjeı tegjeıli túsindirmek boldy.
DÁÝREN BABAMURATOV,jer komısıasynyń múshesi:
- Qurmetti halaıyq, qazir osy jerde bosqa sandalyp, óz ýaqyttaryńyzdy alyp jatyrsyzdar. Almaty qalasynyń sheńberinde jer joq jáne Almaty qalasynan jer berýge sizderden ótinishter qabyldanbaıdy. Qatelespesem Almaty qalasynan basqa kez kelgen jerde, jerge ótinish qabyldanady.
Alaıda, belsendi Dáýren myrza qatty qatelesken edi. Eshbir memlekettik organnyń azamattar ótinishin qabyldamaýǵa qaqysy joq.
SARA TAGAEVA, qala turǵyny:
- Jańa aıtyp jatyr jer berilmeıdi dep, jer joq deıdi Almatyda. Nege osy ýaqytqa deıin aıtpaǵan? Halyq nege munda sandalyp júr? Bul aqymaqtyq qoı. Nege onda ótinishti qabyldap jatyr?
Almaty qalasy boıynsha jer alýǵa qazirdiń ózinde 100 myńnan astam adam ótinish bildiripti. Al respýblıka boıynsha mılıonnan asyp jyǵylady bul kórsetkish. Halyq jer kodeksindegi 50 baptyń 2 tarmaǵy boıynsha árbir azamat 10 júzdik jerge ıelik ete alady degendi basshylyqqa alǵan. Al, bıliktegiler ınfraqurylymy daıyn emes aımaqtan birde-bir jer berilmeıtinin shegelep aıtyp otyr.
