Aqtóbede atys qarýlary qoldanylǵan qaqtyǵys týraly habarlar tosyn oılarǵa jeteleıdi. Qarapaıym logıka. Birinshiden, aqyl-esi ornynda jıyrma shaqty jigit oqystan qarý-jaraq dúkenderine shabýyl jasaıdy. Eger olar bandıttik top bolsa nemese shynymen lańkester bolsa aldyn ala daıyndyq jasap, jospar quryp, qajetti qarý-jaraqtaryn ázirlep almas pa edi. Eshkimniń eki jany joq. Qarý-jaraq dúkenine tobymen shabýyl jasaýy olardyń mundaı sheshimge ashynǵan kúıde aıaq astynan barǵandyǵyn baıqatady.

Ekinshiden, Qazaqstan tájirıbesinde quqyq qorǵaý organdary aqıqatty emes, tek ózderine tıimdi aqparattardy ǵana taratatynyn eskersek, mundaı oqys árekettiń áride jatqan ózindik sebepteri bar ekendigi seziledi. Sol sebep ne? Ol neden týyndady? Shyndyqty biz ádettegideı úsh-tórt jyldan soń ǵana bilip júrmesek bolǵany.

Óz mindetterin atqarý ústinde qaza tapqan polısıa qyzmetkerleri de, shabýyl jasaǵan top músheleri de Qazaqstan azamattary. Qaza bolǵandardyń báriniń otbasylaryna qaıǵylaryna ortaqtasyp kóńil aıtamyz. Qazaqstan zańdary boıynsha sot dáleldep shyqqanǵa deıin eshkimdi qylmysker, sodyr dep ataýǵa bolmaıdy. Sondyqtan ıarlyq taǵýǵa asyqpaı, ol azamattardy qarýly teke-tireske ıtermelegen ne nárse ekenin, tetigi qaıda jatqanyn anyqtaý kerek dep oılaımyn. «Teris aǵymdaǵy din ustanýshylar», «Qazaqstandy azat etý uıymy» degenderdiń eshqaısysy kókeıge qonbaıdy. Munyń astarynda bir qupıa jatqany anyq. Halyq aqıqatty bilýge muqtaj!

Marat Toqashbaevtyń Feısbýktegi paraqshasynan alyndy