Tamyz aıynda «31 arna» qazaqstandyq telekórermenderge jańa syı jasaıdy. Túrkıadaǵy eń úzdik telehıkaıalardyń biri «Ǵashyqtyq derti» (Kara sevda) – súıikti arnalaryńyzda! Syrly sezim, názik mahabbat pen jigitter arasyndaǵy baqtalastyq qatar órilgen tamasha telehıkaıanyń basty keıipkerleri – jigittiń serisi Býrak Ozchıvıt jáne náp-názik Neslıhan Atagúl.  Bul týraly Qamshy.kz habarlaıdy.

 Telehıkaıanyń senarıi biregeı, sújeti detektıvtik jelige qurylǵan, al bárinen buryn symbaty men minezi jarasqan talantty akterleri keıipkerleriniń obrazyn jan-jaqty ashyp, kórermenderdiń tańdaıyn qaqtyrady.  Rejıseri – osyǵan deıin birneshe telehıkaıalardy ómirge ákelgen Túrkıaǵa tanymal tanymal rejıser Hılal Saral.

«Ǵashyqtyq dertindegi» Túrkıanyń jasyl jelekke toly alqaby, tarıhy tereń eldiń qarapaıym halqynyń, dáýletti áýletterdiń ómir salty, jan tebirenter áýenderi men tamasha ánderi kórermenderdi tánti qylady.   

Áıgili «Súleımen sultan» telehıkaıasynda Balı Beıdiń rólin somdaǵan talantty akter Býrak Ozchıvıt, qalyń kópshilikke sondaı-aq «Sary shymshyq», «Kishkentaı qupıalar. Stambýl syrlary», «Eriksiz kúıeý» syndy telehıkaıalardaǵy rólderi arqyly tanymal. Al «Ǵashyqtyq dertinde» kedeı shahtashy bolyp júrip, aıaq astynan baıyp, úlken dáýletke ıe bolatyn Kemal atty jas jigttiń rólin somdaıdy.

 Taǵdyr Kemalǵa kenetten tosynsyı jasaıdy. Ol úrip aýyzǵa salǵandaı Nıhan atty sulý stýdent qyzǵa ǵashyq bolady. Nıhan da ony bir kórgennen unatady. Alaıda, eki ǵashyq eki álemniń ókili. Biri – baıdyń qyzy, ekinshisi – kedeı jigit. Olardyń aldynda – úlken tańdaý tur. Úlken ómirge qadam basý úshin sheshim qabyldaýǵa tıis. Áıtkenmen, taǵdyrdyń tálkegimen Kemal ǵashyǵymen aıyrylysýǵa májbúr bolady. Sóıtip ol ómirden úlken sabaq alyp, sezimin júreginiń túkpirine jasyryp, shahtada jumys isteý úshin Zongýldak qalasyna ketip qalady. Al Nıhan dáýletti otbasynan shyqqan Emır atty qatygez jigitke eriksiz turmysqa shyǵady. Sodan bastap Kemal men Nıhannyń joly ekige aıyrylady. Birin-biri essiz súıgen eki ǵashyq mahabbattan birjola kúder úzgendeı bolady...

 Alaıda ómir óz degenine kóndiredi eken. Kemal jumys isteıtin shahtada oryn alǵan apat – onyń taǵdyryn múlde basqa arnaǵa buryp jiberedi. Sonyń arqasynda ol tanymastaı bolyp ózgerip, Nıhan men Emırde, ózin taǵdyrynan qashýǵa májbúr etken adamdarda ketken kegin qaıtarý úshin Stambýlǵa qaıta oralady.

 Bul hıkaıadan kórermender adamnyń baǵy bir sátte janyp, bir sátte ýysynan sýsyp ketýy múmkin ekenin, áleýmettik teńsizdiktiń qolyńdy jipsiz baılaýy da, kúresker bolyp qalyptasýǵa yqpal etýi de múmkin ekenin túsinedi. Taǵdyr kez kelgen bitpegen oqıǵaǵa núkte qoıady. Beıtanys jan dep júrgeniń jaqynyń bolyp, al jaqynyńdy múlde tanymaıtyn bolyp shyǵýyń da ǵajap emes.

 Mahabbat derti – júrekke aıyqpas jara salady. Ol – kózsiz, azapqa toly, alaıda máńgilik taýsylmaıtyn ǵajaıyp sezim. 

8 tamyzdan bastap dúısenbi men juma aralyǵynda 21.00-de 31 arnada. 

Otyz birinshi arna – tańǵaldyratyn, shabyt pen meıirim syılaıtyn, qyzyqty, qaýipsiz, búkil otbasyna arnalǵan ulttyq oıyn-saýyq arnasy. Arnanyń urany – «Otbasymen birge kóreıik!».