OQO İİD Uıymdasqan qylmysqa qarsy kúres basqarmasynyń qyzmetkerleri byltyr áleýmettik jeliler arqyly bopsalaýdyń 5 deregin anyqtap, qylmystyń betin ashqan. Bul týraly departamenttiń baspasóz qyzmeti habarlap otyr.
«Ókinishke oraı kóptegen adamdar kezdeısoq tanystyq, onyń ishinde áleýmettik jeliler arqyly tanysqanda óziniń jeke ómiriniń qaýipsizdigi jaıly oılamaıdy. Jeke ómirine qol suǵýshylyqtyń qurbany bolýy múmkindigi týraly kúdiktenbeıdi de. Al, keıbir teris pıǵyldy adamdar, óziniń qurbanyn aldyn ala kózdep onyń jeke málimetteri men áshkereleıtin fotosýretterin qolǵa túsirgen soń, qomaqty qarajat talap etedi», - deıdi polıseıler.
Máselen, ótken jyldyń sońynda Saryaǵash AİİB-ne 26 jastaǵy boıjetken habarlasyp, tanysy ózin áshkereleıtin fotosýretterdi ınternet jelisine júkteımin dep qoqyn-loqy kórsetip, 800 myń teńge talap etkenin málim etken.
Polıseıler jedel-izdestirý is-sharalary barysynda 1983 jyly týylǵan jergilikti turǵyndy kúdikti retinde quryqtady. Óz kinásin tolyq moıyndaǵan kúdiktiniń aıtýynsha, ol osy ádispen materıaldyq jaǵdaıyn jaqsartpaq bolypty. Aıǵaq zat retinde aqsha, foto jáne vıdeomaterıaldar tárkilendi. Atalǵan jaıt Saryaǵash AİİB-nyń sotqa deıingi biryńǵaı tergep-tekserý tizilimine tirkelip, QR QK-niń 194-babymen «Bopsalaýshylyq» qylmystyq is qozǵaldy. Sotqa deıingi tergeý jumystary júrýde.
Internet jelisin paıdalanyp bopsalaýshylardyń arasynda tek er adamdar ǵana emes, názik jandylar da bul joldy paıdalanýda. 2016 jyldyń qazan aıynda polısıaǵa Shymkent qalasynyń 57-jastaǵy turǵyny kelip, tanysy ony áshkereleýshi málimetterdi áleýmettik jelilerge júkteımin dep qorqytyp, jábirlenýshiden 100 myń AQSH dollaryn talap etkenin aıtqan.
Atalǵan jaıt Sotqa deıingi biryńǵaı tergep-tekserý tizilimine tikelip, QR QK-niń 194-babymen «Bopsalaý» qylmystyq is qozǵaldy. Júrgizilgen jedel-izdestirý is-sharalary barysynda polıseıler aqsha alý kezinde Shymkent qalasynyń turǵyny 1987 jylǵy azamatshany qolǵa túsirdi. Sotqa deıingi tergeý amaldary júrýde.
