Búgin belgili opozısıalyq saıasatker, 32 jasynda-aq Qazaqstannyń Aqparat mınıstri qyzmetine kelgen, ashyq oıly, jańashyl tulǵa Altynbek Sársenbaıulynyń qastandyqpen qaza tapqanyna 11 jyl toldy.
Osyǵan oraı, Táýelsiz Qazaqstannyń shoqtyǵy bıik saıasatkeri, saıası qurban Altynbek Sársenbaıulyn áriptes dostary, týystary jáne úlgi tutar shákirt jastar eske aldy. Eske alý tańerteń erte qaıratkerdiń jerlengen Keńsaı zıratyna baryp quran oqýdan bastaldy. Qabir basyna memleket jáne qoǵam qaıratkeri Tólegen Júkeev pen Oraz Jandosov, Jas Alash gazetiniń bas redaktory Rysbek Sársenbaıuly, Saıasattanýshy Aıdos Sarym, jýrnalıs Ermurat Bapı syndy el tanyǵan azamattar bardy.
Qabir basynda Altynbek Sársenbaıulynyń aǵasy Rysbek Sársenbaıuly «Bul kún qazaq halqy jaqsy ómir súrse dep armandaǵan Altynbekke alǵys aıtatyn, oǵan qastandyq jasaǵandarǵa qarǵys aıtatyn kún», - dedi.
Almatydaǵy Astana qonaqúıinde jalǵasqan eske alýǵa arnalǵan baspasóz konferensıasyna Qazaqstannyń halyq jazýshysy Qabdesh Jumadilov, qoǵam qaıratkeri Evgenıı Jovtıs, Eldegi sóz bostandyǵyn baqylaıtyn «Ádil sóz» qorynyń jetekshisi Tamara Kalıevalar baıandama jasady. Baıandamada sóz bostandyǵy men aqparattyq erkindik, saıası táýelsizdik sóz boldy. «Altynbekke atylǵan oq – halyqqa atylǵan oq» degen sóz taǵy bir jańǵyrdy. Qazaqstan Respýblıkasynyń táýelsiz memleket bolyp qalyptasýyna eleýli úles qosqan qaıratkeri – Altynbek Sársenbaıulynyń ólimine baılanysty qylmys áli ashylmady dep sanaıdy týystary. Olardyń oıynsha, «5 oq atylǵan qylmys kúni búginge deıin tolyq ashylmady. Onyń sebebi saıası tapsyrys bolýynda.»
Aıta keter bolsaq, Altynbek Sársenbaıuly men onyń kómekshileri Baýyrjan Baıbosyn jáne Vasılıı Jýravlev 2006 jyly dál osy kúni qastandyqpen qaza tapty.
Bas prokýratýranyń málimdemesine sáıkes kezinde Altynbek Sársenbaıulyn óltirý jónindegi tapsyrysty oryndaǵany úshin aıypty dep tanylǵan Rýstam Ibragımbekov 2012 jylǵy sáýirde Qazaqstannyń Joǵarǵy sotyna qaıta aryz jazyp, «qastandyqqa tapsyrys berýshiniń shyn esimin» jarıa etken.
2013 jyly jeltoqsannyń 20-sy kúni Qazaqstan bas prokýratýrasynyń ókili Astanada arnaıy brıfıń ótkizip, «Altynbek Sársenbaıulyn óltirýge tapsyrys berýshi Erjan Ótembaev emes, Rahat Álıev pen Álnur Musaev» degen málimdeme jasady. Erjan Ótembaev 2006-shy jyly saıasatker Altynbek Sársenbaıulyn óltirýge tapsyrys berdi degen aıyppen 20 jylǵa sottalǵan bolatyn, keıinnen onyń jazasy eki ret jeńildetilip, bosap shyqty. Qylmysqa aıypty dep tanylǵan, UKQ eks basshylary, syrttaı sottalǵan Rahat Álıev 2015 jyly 24 aqpan kúni Avstrıa túrmesinde jumbaq jaǵdaıda qaıtys boldy. Óliminiń sebebi retinde ózine qol jumsaǵany aıtyldy; Álnur Musaev bolsa Eýropada bostandyqta júr.
Altynbek Sársenbaıuly – 1993-inshi jyldan bastap Qazaqstannyń baspasóz jáne buqaralyq aqparat mınıstri, aqparat jáne qoǵamdyq kelisim mınıstri, mádenıet, aqparat jáne qoǵamdyq kelisim mınıstri, 2001-inshi jyldan Ulttyq qaýipsizdik Keńesiniń hatshysy, Qazaqstannyń Reseıdegi tótenshe jáne ókiletti elshisi syndy laýazymdy memlekettik qyzmetterdi atqardy. Al 2003 jyldyń kúzinen bastap Altynbek Sársenbaıuly Qazaqstan opozısıasynyń qataryna qosylyp, «Aq jol» demokratıalyq partıasynyń teń tóraǵasy bolyp saılandy. 2004 jyly Qazaqstanda parlament saılaýy óter aldynda Altynbek Sársenbaıuly az ǵana merzimge aqparat mınıstri qyzmetine qaıta oraldy. Alaıda, sol jyly kúzde ótken parlament saılaýy zań talaptaryn óreskel burmalaýshylyqpen ótkizilgenin málimdep, oǵan narazylyq retinde mınıstr qyzmetinen ketti. 2005 jyldan opozısıalyq «Naǵyz Aq jol» partıasynyń teńtóraǵasy jáne «Ádiletti Qazaqstan úshin» respýblıkalyq qozǵalysynyń tóralqa múshesi boldy.
Oqyrman nazaryna jýrnalıs Qasym Amanjoluly túsirgen Altynbek Sársenbaıuly týraly «Elimniń erteńi ne bolmaq» atty derekti fılmdi usynamyz.
