Tanymal telejýrnalıst Tileýqabyl Myńjasar aǵam qala ortalyǵynda kele jatsa, eki jigit jańadan salynǵan saýda dúkenininiń mańdaıshasyna «Biz ashyldyq» degen úlken jazýdy ilip jatyr eken.
- Áı, baýyrlarym-aı, osy senderdi túsinbeı-aq qoıdym, orystyń «My otkrylıs» degen sózin aýdaryp paıdalana beretinderiń ne? Onyń ornyna naǵyz qazaqı uǵymmen «Ábden shashyldyq, áıteýir ashyldyq» dep jazsańdar shynaıy shyǵady ǵoı. Óıtkeni bul sóılemde senderdiń qaryzdanyp-qaýǵalanyp, bankterden nesıe alyp, qınalsańdar da bıznes jasaýǵa áreket etip jatqandaryń baıqalady. Sosyn jaǵdaılaryńdy túsingen jaqsy jandar «mynalar shyndaryn jazypty, saýdalary júrsin» dep kúnde senderge keletin bolady,- deıdi.
Álgi eki jigit muny qojaıyndaryna aıtsa, qulaqqa kiretin nárse eken dep jarnama agenttigine qaıtadan tapsyrys beripti. Arada bir kún ótkende «Ábden shashyldyq, áıteýir ashyldyq» degen jazý ótken-ketkenniń nazaryn ózine erekshe aýdaryp turady. Bireýler «oıpyrmaı, jańadan ashylǵan asqana, meıramhana, dúken, saýda ortalyǵy men mekemelerdiń bárinde «Biz ashyldyq», «My otkrylıs» degen jarnamalardan kóz súrinýshi edi, mynalardiki keremet eken» dese, endi bireýler «shyndyq shyryldap tur ǵoı, kómegimiz bolsyn, osy dúkenge jıi kelip turaıyq» dep janashyrlyq tanytatyn kórinedi.
Bir aıdan soń Tilekeń álgi dúkenge bas suǵyp, jaǵdaılaryn suraıdy.
- Saýdamyz qyzý júrip jatyr, alýshy da kóp, kelýshi de kóp áıteýir,- dep máz bolady dúken ıesi.
- «Ábden shashyldyq, áıteýir ashyldyq» degen jarnamalaryń kúshti boldy-aý shamasy,- deıdi Tilekeń.
- Iá, ıá, bir aǵanyń aıtýymen jasatqanbyz ony.
- Sol aǵa men bolatynmyn.
- Solaı ma, oı rahmet, rahmet aǵa, bizge tamasha keńes berdińiz,- dep dúkendegilerdiń bári alǵystaryn jaýdyrady.
- Negizi, qazaqı jarnama - tabystyń qaınar kózi. Osyny árdaıym este saqtańdar,- dep aǵamyz aıańdap kete beripti.
***
Tileýqabyl aǵanyń taǵy bir qazaqı jarnamasy halyqtyń aýzynda júr. Ol bylaı bolǵan.
- «Úı satylady» dep dýalǵa úlkeıtip jazyp qoıǵanyma kóp boldy, biraq eshkim bas suǵyp, saýdalaspaıdy deıdi bir tanysy Tilekeńe.
- «Úı satylady» degen Keńes zamanynan qalǵan. Oǵan jurttyń kózi de, qulaǵy da úırenip ketken. Eshkim mán bermeıdi, qaramaıdy. Sondyqtan qazirgi talapqa yńǵaılap, basqasha jazý kerek. Máselen, «Úıimizdi sataıyn dep otyrmyz» dep jazsańdar , mynaý ne deıdi dep ótken-ketkender jalt qaraıdy. Óıtkeni ondaı jarnamany eshqashan, esh jerden kórmegen,- deıdi aǵamyz.
Usynysty buljytpaı oryndaǵan álgi uqypty adam kóp ýaqyt ótpesten «aıtqanyń ras eken, úıimizdi sattyq» dep Tilekeńe telefon shalypty.
Avtory: Ardaq Aıbaruly
