"Alash Aınasynyń" Bas redaktory Serik Janbolat óziniń Facebook paraqshasynda qazirgi qyzdyń tárbıesi, ımandylyǵyn sóz etti.
"Osy biz batys bolamyz dep - bola almaı, shyǵystan ketemiz dep - kete almaı, eki ortada ábden daǵdaryp qaldyq-aý deımin? Olaı deýime sebep: biraz jyl buryn bir top adam qyzdardy oqytatyn qazaq-túrik lıseıine bas suqqanymyz bar. Sonda oqıtyn qyzdardyń ınabattylyǵyn, izettiligin kórip esimizden tanyp qalǵanymyz - shyndyq. Basqa oqý oryndaǵydaı qaıqańdap qaǵyp ótpeıdi, jasy úlken adamǵa bári de mindetti túrde sálemdesedi. Betpe-bet kelip qalsań, jol beredi. Eshqandaı jasandylyq joq, bári qazaqsha, bári jarasymdy. Adamdar birin-biri julyp jegen myna qasqyr zamanda basqa álemge túsip ketkendeı kúı keshtik. Kózimiz alaqandaı bolyp syrtqa shyqqan soń áserimizdi bólisip jatyrmyz. Sonda biz ózimizdiń uly shyǵystyń ajyramas bóligi ekenimizdi sezindik. Uly mádenıettiń uıasy - shyǵys emes pe?! Sondaı maqtanysh kernedi. Mynadaı oı týady: áıgili JenPI deıtin qyzdar ýnıversıteti o basta osyndaı maqsatta qurylmap pa edi? Áıtpese, eldiń balalaryn qyzdar, uldar dep bólip jatqan basqa oqý orny neken-saıaq. JenPI shyǵys mádenıeti men óneriniń oshaǵy, qazaq qyzdaryna ómir fılosofıasyn tujyrymdap beretin eń uly ortalyq bolýǵa tıis emes pe? Kádimgi bilimdi kez-kelgen oqý orny bere alady. Al, JenPI basqalardyń qolynan kelmeıtin dúnıelerdi jasaýǵa tıis sıaqty kórinedi maǵan. Ony bitirgen árbir qyz bala qazaq mádenıetiniń gúli men sımvoly bolyp júrse shirkin degen oı ǵoı. Olaı deýge taǵy bir sebep: qazir Almatyda qyz balalarǵa arnalǵan jeke mektepter bar eken. Meniń bir bıznesmen dosym óziniń qyzyn soǵan áreń ornalastyrǵanyn aıtady. Ol jerde qyz balaǵa poezıa men sýretten, balet pen sporttan, etıka men estetıkadan, klasıkalyq óner men fılosofıadan dáris beredi eken. Ár balamen jumys isteıdi, tapsyrma beredi. Óleń jattaıdy, sheshen sóıleýdi meńgeredi. Ókinishtisi: ol jerde qazaqı dúnıe joq. Bah men Mone bar, Ahmatova men Nısshe bar. Abaı men Domalaq ana joq biraq. Farıza men Naýryzbaev joq. Zeınep Ahmetovanyń qazaq otbasy fılosofıasynyń ıisi de joq. Árıne, olardy qazaqsha oqytpadyń dep kinalaýdan aýlaqpyn. Shyǵystyń uly fılosofıasy men iliminen jurdaı bolyp, búgingi zamannyń eń qajetin qazaqsha oqyta almaı otyrǵan ózimiz emes pe? Osyny istesek, bireý bizge qoı dedi me? Tek Zeınep apaı, sol, shyryldap júrgen. Biraq, jalǵyz ózi tutas ulttyq mektep pen dástúr qalyptastyra ala ma? Sondyqtan, JenPI myńdaǵan Zeınep apaılardy daıyndap shyǵaratyn ulttyq ortalyq bolsa degen oı ǵoı meniki. Sonda biz shyǵys elindegi bastaý-bulaǵymyzǵa, ulttyq dástúr men tárbıege qaıtyp oralar ma edik?" dep jazdy Serik Janbolat.
