Qytaıdyń sina.com saıty weibo paraqshasyna «Singer-2017» án baıqaýyna qatysyp jatqan Qazaqstandyq ánshi Dımash Qudaıbergenniń baraban aspabynda óner kórsetken vıdeosyn jarıalandy, dep habarlaıdy QazAqparat

Jankúıerler Dımashtyń ónerine tánti bolyp, naǵyz talant ıesi, segiz qyrly bir syrly jigit dep baǵa bergen. Al 1 naýryz kúni keshte júktelgen vıdeony tamashalaǵan adamdar sany 400 myńǵa jaqyndaǵan.

Aıta keterligi, Weibo áleýmettik paraqshasynda Dımashtyń pıanınoda jáne Dombyrada kórsetken ónerine Qytaılyq jankúıerleri erekshe tánti bolǵan. Al jobanyń altynshy kezeńinde Dımash ózi pıanınoda oınap, Lara Fabıannyń «Adagio» ánin aıtqan bolatyn.

Bul kúnde Dımashtyń Weibo áleýmettik paraqshasyna tirkelýshiler sany 2 mıllıon 500 myńnan asty.  

Eske sala keteıik, otandasymyz baıqaýdyń jetinshi kezeńinde Qazaq ulttyq aspaptar órkestriniń súıemeldeýimen «Daıdıdaý» ánin aıtady. Sondaı aq, Dımash sahnada dombyramen óner kórsetetin bolady.

Jetinshi kezeń efırden 4 naýryzda kórsetiledi.