Almatydaǵy Respýblıka saraıynda alǵashqy qazaq-qytaı birlesken jobasy - "Kompozıtor" kórkem fılminiń saltanatty tusaýkeseri ótti dep habarlaıdy Qamshy.kz aqparat agenttigi  "Qazaqfılm" baspasóz qyzmetine silteme jasap. 

Kartınany Sh.Aımanov atyndaǵy "Qazaqfılm" kınostýdıasy men qytaılyq Shinework Pictures kompanıasy jasap shyqqan.

Rejıserleri Qazaqstan atynan - Sábıt Qurmanbekov, al Qytaı tarapynan - Sherzat Iakýb.

Aıtýly aqyn, jazýshy, qoǵam jáne saıasat qaıratkeri Oljas Súleımenov jáne basqa da kóptegen tanymal otandyq mádenıet jáne kıno qaıratkerleri tusaýkeserdiń qurmetti qonaǵy boldy.

Fılm Sán Sınhaıdyń ómiri men shyǵarmashylyǵy týraly baıandaıdy. Onyń Keńes odaǵy kezinde, Almatyǵa evakýasıalanǵan shaǵyn, qazaq kompozıtory Baqytjan Baıqadamovpen dostyǵyn kórsetedi.

Kórsetilim aldynda fılmniń Qazaqstan tarapynan bas prodúseri, Sh.Aımanov atyndaǵy "Qazaqfılm" AQ birinshi vıse-prezıdenti Serik Jubandyqov pen qytaılyq prodúser, Shinework Pictures" kompanıasynyń prezıdenti Djonatan Shen jáne QHR Almatydaǵy bas konsýly Chjen Veı myrza kórermenderge shyqty.

"Biz úsh jylǵa jýyq túsirgen fılmimiz "Kompozıtordy" sizderge usynǵanymyzǵa qýanyshtymyz. Bul qazaq-qytaı birlesken alǵashqy fılmde qazaqtyń kompozıtory Baqytjan Baıqadamov pen qytaılyq kompozıtor Sán Sınhaıdyń arasyndaǵy dostyǵyn kórsetý arqyly, eki eldiń dostyǵyn kórsetkimiz keldi", - dedi Serik Jubandyqov.

"Bul tusaýkeser kóńilimdi tolqytty. Osydan 70 jyl buryn qıyn jaǵdaıǵa tap bolǵan qytaı kompozıtory Sán Sınhaı Almatyǵa kelip, qazaqtyń tanymal kompozıtory Baqytjan Baıqadamovpen tanysady. Baıqadamovpen onyń otbasy oǵan rıasyz kómek kórsetedi.

Mine, 70 jyl ótken soń, Qazaqstan men Qytaı kınemtografısteriniń arqasynda, kópshilik bile bermeıtin jáne áserli oqıǵa úlken ekranǵa jol tartty", - dedi bas konsýl Chjan Veı.   

Fılmniń tómendegi quramy da kórermender aldyna shyqty: rejıser Sábıt Qurmanbekov, prodúser Qýanysh Ahmetov, Qalamqas Arıslanovanyń rolin somdaǵan kishkentaı aktrısa Dilnaz Nurseıit, qoıýshy operator Lý Hýnı (QHR), qoıýshy rejıser Lý Iýelın (QHR), jáne atqarýshy prodúser Iao Chýngýan (QHR). Kórsetilimnen soń kórermender nazaryna Qalamqas Arıslanova men Sán Sınhaıdyń qyzy Nınanyń Qytaıda kóriskeni týraly qysqa derekti fılm usynyldy.

Dý qol shapalaqpen sahnaǵa Qalamqas Arıslanova jáne Baqytjan Baıqadamovtyń qyzdary: Baldyrǵan Baıqadamova, Aıgúl Baıqadamova jáne Alýa Baıqadamova kóterildi. Olar Baqytjan Baıqadamov pen Sán Sınhaıdyń dostyǵy týraly aıtyp berdi. "Sán Sınhaı - maǵan baqytty balalyq shaq syılaǵan adam", - dep tolqı sóıledi Qalamqas Arıslanova. 

Sonymen qatar, is-shara aıasynda BAQ jáne qonaqtarǵa Qalamqas Arıslanovanyń "Qytaı halqynyń kompozıtory Sán Sınhaı. Qazaqstandaǵy ómiri" atty kitabynyń tusaýy kesilip, avtordyń qatysýymen avtorgraf-sessıa ótti. Tusaýkeser aldynda fılmniń shyǵarmashylyq tobymen birge baspasóz otyrysy ótti.