QR Tuńǵysh Prezıdentiniń «Bes áleýmettik bastamasyn», onyń ishinde Elbasynyń «Árbir otbasy úshin turǵyn úı satyp alýdyń jańa múmkindikteri» birinshi bastamasyn júzege asyrý aıasynda Qaraǵandynyń Aqadyr kentinde kópbalaly otbasylar baspanamen qamtyldy dep habarlaıdy Qamshy.kz aqparat agenttigi.

Kópbalaly januıalarǵa berilgen árbir jer úılerdiń turǵyn úı aýmaǵy 100 sharshy metrden asady. Úıler turmysqa qajetti jıhazben jabdyqtalǵan. Turǵyn úılerdi kópbalaly otbasylarǵa «Astana Motors» kompanıasy syıǵa tartty.   

Baspana kiltterin tabys etý rásimine Qaraǵandy oblysynyń ákimi Erlan Qoshanov pen «Astana Motors» kompanıasynyń prezıdenti Nurlan Smaǵulov ta keldi. 

«Elbasynyń tapsyrmasy boıynsha óńirde kópbalaly otbasylarǵa erekshe kóńil bólinýde. Bul januıalardyń árqaısysy úshin eń ózekti másele – óz baspanasynyń bolmaýy. Bul máseleni sheshýge kásipkerler kómektesýde. Bıyl kezekte turǵandar qatarynan 700 otbasy páter kiltterin alady. Olardyń úshten biri bıznesmenderdiń kómegimen jańa baspanaǵa qonystanady. Táýelsizdigimiz qalyptasa bastaǵannan beri memleket kásipkerlerdi qoldap keledi. Búgin bıznes aıaqtaryna nyq turyp, memleketke áleýmettik máselelerdi sheshýge kómektesetin kez keldi. Balalarymyz ben nemerelerimiz osyndaı uly adamdardy úlgige ala otyryp, ósip-ónýi tıis. Dál osyndaı sharalar «Týǵan jer» ıdeıasyn - óziniń týǵan jerine, otanyna kómek kórsetý kerektigin naqty mysal retinde kórsetedi», - dedi oblys ákimi Erlan Qoshanov. 

Turǵyn úıler qonystanýshylardyń jańa ómir bastap, sharýashylyqpen aınalysýyna yńǵaıly etip jabdyqtalǵan. Jeke jer telimi bar turǵyn jaılardyń endigi ıeleri baý-baqsha egýilerine múmkindikteri bar. 

«Jasym 32-de. 4 balanyń anasymyn. Baspana kezeginde 8 jyldaı turdyq. Búgin mine záýlim saraıdaı úıdiń ıesi atandyq. Qýanyshymyzda shek joq. Qasıetti Ramazan aıynda baspanaly bolyp jatyrmyz. Ásirese, balalarym rıza. Úı úlken, jaryq. Aýlasy da keń. Balalardyń oınaýyna yńǵaıly etip abattandyrylǵan, úıdiń artynda baý-baqshaǵa arnalǵan jeri de bar, onda kókónis egip, sharýashylyqpen aınalysýǵa bolady. Úıimiz ortalyqta ornalasqan, balalardyń mektebine de jaqyn. Qatty qýanyshtymyz. Kópbalaly otbasylarǵa kórsetilgen qamqorlyqtary úshin memleketke, «Astana Motors» kompanıasynyń basshylyǵyna alǵysym sheksiz», - deıdi kópbalaly ana Aızada Ryspekova. 

«Astana Motors» kompanıasy kópbalaly otbasylarǵa qoldaý kórsetip ǵana qoımaı, jergilikti mekteptiń talantty túlekterin elimizdiń úzdik joǵary oqý oryndarynda oqytpaq. 

«Aqadyr - meniń kishi Otanym. Bul jerde meniń ákem ósip, balalyq shaǵyn ótkizgen. Bul jer meniń ata-babalarym úshin ystyq bolǵan meken. Tabysqa jetken kez kelgen adam óziniń Otany aldyndaǵy qaryzyn qaıtarýy tıis. Men búgin óz týystaryma kómektesip jatqanyma qýanyshtymyn. Bizdiń kompanıa qaıyrymdylyqpen belsendi túrde aınalysady, adamdarǵa kómektesedi. Bul bizdiń tujyrymdamamyz, bizdiń ómir saltymyz jáne bizdiń fılosofıamyz», - dedi Nurlan Smaǵulov. 

Kompanıa Aqadyr turǵyndary úshin 2011 jyly «Astana Motors» balalar men jasóspirimder sport mektebin salǵan. Onda balalar baseıni men kúres zaly bar. Sporttyq nysanda dzúdo, sambo, qazaqsha kúres, fýtbol chempıonattary ótedi. 

Qaraǵandy oblysy ákimdiginiń málimetinshe, bıyl Aqadyr kentinde 70 páterli turǵyn úı qalpyna keltirilip, paıdalanýǵa berildi. Qonystanýshylar arasynda kópbalaly otbasylar boldy. Olardyń barlyǵy turǵyn úı alý kezeginde turǵan. 

Bıyl kentte 32 páterli úı salynady. Kelesi jyly taǵy eki kópqabatty úı paıdalanýǵa berilmek. 

Eske salaıyq, buǵan deıin aımaqta 27 otbasy óz páterlerine ıe bolǵan bolatyn. 1 mamyr kúni oblystyń Temirtaý, Balqash, Saran, Qarajal, Abaı, Prıozersk, Shaxtınsk qalalarynda, Buqar Jyraý, Qarqaraly, Jańaarqa jáne Nura aýdandaryndaǵy kópbalaly otbasylarǵa da páter kiltteri tabys etilgen. 

Sondaı-aq, mamyr aıynyń sońynda qaraǵandylyq 86 kópbalaly otbasy qonys toıyn toılady. 

Qaraǵandy oblysy ákimdiginiń málimetinshe, bıyl oblysta 560 kópbalaly otbasy baspanaly bolmaq.