Ústimizdegi jyldyń 26-sáýir kúni Almaty oblysy Eskeldi aýdanyna qarasty Qaınarly aýylynda aıtyp jetkizýge kelmeıtin sumdyq oqıǵa oryn alǵan bolatyn. Osy jaǵdaı boıynsha Qamshy.kz aqparat agenttigi tolyq aqparatty ózderińizge usynbaq.

Aýyl moldasy Qadir Ámbıeuly óziniń otbasylyq dosy, din jolyndaǵy jamaǵaty Esqat Áınekbekulynyń áıeli, úsh balanyń anasy Nurǵıza Azathanqyzyna zorlyq-zombylyq qylyp, zına jasaǵan bolatyn. Ardyń aýyrlyǵyn kótere almaı, bes ýaqyt namaz oqıtyn marqum Nurǵıza Azathanqyzy óz-ózine qol salǵan. Esqat Áınebekuly Qazaqstan Respýblıkasynyń prezıdenti Qasym-Jomart Toqaevqa, İshki ister mınıstri Erlan Turǵymbaevqa, QR Bas prokýrory Ǵızat Nurdaýletke vıdeo arqyly ashyq hat joldaǵan. Ol áıeliniń ólimine sebepker bolǵan Almaty oblysy Eskeldi aýdany Qaınarly aýylynyń moldasyn jazaǵa tartýyn suraǵan. Tolyq málimetti osy jerden oqyńyz: Qaınarlydaǵy qaıǵyly oqıǵa: Moldany qandaı jaza kútpek? (fotoreportaj)

Qazirgi ýaqytta Qadir Ámbıeulyna qatysty tergeý isi Taldyqorǵan qalalyq İİD-de júrip jatyr. Esqat Áınekbekuly:

«Qazir is qozǵalyp jatyr. Qalalyq İİD qyzmetkeri Nurmuhanov Murat Jáleluly óz qolyna alyp, isti tolyq zerttep jatyr. Osy kezde saraptama júrip jatyr dep otyr. Qaı kezde biteri belgisiz. Bir jarym aıdyń ishinde biraz bardym. Taýdan aýylǵa túsken kúni mindetti túrde kirip-shyǵamyn, áıteýir. Jaqyn arada sheshilse durys bolar edi. Keshe ǵana marqum jarymnyń qyrqyn berdim»,- dedi tilshisine bergen suhbatynda.

Balalarynyń jaǵdaıy jaıly suraǵanymyzda:

«Balalar qazir jazǵy demalysqa shyqty. Qaryndasym qaraıtyn bolar dep oılap edim. Jaǵdaıy kelmeıtin bolyp tur. Jeńgeme tapsyraıyn desem, ol kisi de aýyryp júr. Jaqynda ǵana Qytaıdan áke-sheshem kelip ketti. Biraq olardan ne paıda? Shekaranyń kesirinen artqa qaıtýǵa májbúr boldy. Balalarymdy ózimmen taýǵa alyp ketýden basqa amal joq»,- deıdi.

Óziniń dosy, uıyp namaz oqyǵan moldasy, qazirgi jek kóretin adamy bolyp ketken Qadir Ámbıeulyna qatysty:

«Júr ǵoı ol osy mańda. Kúndiz tergeýde bolady, keshkisin qaıtadan qaıtady. Sottalatyn adamǵa múlde uqsamaıdy.»,- dep ashynady Nurǵıza Azathanqyzynyń kúıeýi.

Qaınarly aýylynyń turǵyndarynyń basym kópshiligi Qytaıdan qonys aýdarǵan. 2010 jyldan bastap eki-úsh otbasy bolyp, shekaradan ótip otyrǵan. Qara jamylǵan áýlette shekarany 2015 jyly basyp ótken.

İske qatysty Taldyqorǵan qalalyq İİD-ine hat joldandy. Sharıǵat úkimin bilý úshin QMDB-nyń jaýabyn aldaǵy ýaqytta alamyz. Hattyń jaýaby kelisimen birden ózderińizben bólisemiz.