"Sybaılas jemqorlyqqa qarsy is-qımyl ulttyq búrosy bilim jáne ǵylym vıse-mınıstrine qatysty laýazymdyq ókilettilikterin teris paıdalaný, para alý, kásipkerlik qyzmetke zańsyz qatysý faktileri boıynsha sotqa deıingi tergeýdi bastady. Sot sanksıasymen bilim jáne bilim vıse-mınıstrine kúzetpen ustaý sharasy qabyldandy. Tergeý jalǵasyp jatyr", - dedi agenttiktiń resmı ókili Janna Bastarova.

Ol qylmystyq-prosestik kodekstiń 201-babyna sáıkes ózge aqparat jarıa etilmeıtinin atap ótti.

"Biraq bir nárseni atap ótkim keledi, vıse-mınıstrge qatysty tergeý qylmystyq kodekstiń 361-shi, 364-shi jáne 366-shi baptary boıynsha júrgizilip jatyr. Kúdiktige qatysty túpkilikti sheshimdi sot shyǵarady", - dep túıindedi Bastarova.

Aıta ketsek, 5 maýsym kúni sybaılas jemqorlyqqa qarsy is-qımyl ulttyq búrosy bilim jáne ǵylym vıse-mınıstrine qatysty sotqa deıingi tergeý bastalǵanyn málimdegen bolatyn. Alaıda onyń esimin jarıalaǵan joq. 

Al búgin Nur-Sultan qalasynyń mamandandyrylǵan aýdanaralyq tergeý soty kúdikti Elmıra Sýhanberdıevanyń eki aıǵa qamaýǵa alynǵanyn habarlady.  

Elmıra Sýhanberdıeva ál-Farabı atyndaǵy Qazaq ulttyq ýnıversıtetin támamdaǵan, psıhologıa ǵylymdarynyń kandıdaty. Eńbek jolyn 1989 jyly Aqtaý mektebinde tarıh pániniń muǵalimi bolyp bastady.

2000 jyly Almaty oblysy İle aýdany ákimi apparatynyń uıymdastyrýshylyq-kadr jumysynyń bas mamany boldy. Almatyda "Aı-Nur" jekemenshik lıngvısıkalyq gımnazıasynyń atqarýshy dırektory, keıin Almaty oblysy İle aýdany №7 orta mektebiniń dırektory bolyp jumys istedi.

2007-2009 jyldar aralyǵynda Almatydaǵy "Qazaqstan" respýblıkalyq teleradıokorporasıasynda basqarýshy laýazymdardy atqardy.

2013-2016 jyldary Astananyń (qazirgi Nur-Sultan) bilim basqarmasyn basqardy. 2016 jyldyń sáýirinde bilim jáne ǵylym mınıstriniń orynbasary bolyp taǵaıyndaldy.

Sondaı-aq, Elmıra Sýhanberdıeva – besinshi shaqyrylymdaǵy elordalyq máslıhattyń depýtaty, bilim salasynyń qurmetti qyzmetkeri ataǵy da bar.

Menedjment jáne basqarýǵa qatysty birqatar maqalanyń avtory: "Bilimdegi jańalyqtar", "Bilim", "12-jyldyq bilim", "Bilim uıymy jetekshisiniń anyqtamalyǵy", "Qazaqstan mektebindegi tarıh", "Qazaq ustazy", "Astana" jáne taǵy basqalary.