Buryn avtokólikti boıaý jáne árleý prosesi tek adam qolymen atqarylatyn, qıyn ári ýaqytty kóp qajet etetin jumys bolsa, endi bul mindetterdi robottar jyldam ári dál oryndaıdy. Osyǵan oraı, Almatyda Auto Space Detailing kompanıasynda jańa tehnologıanyń ashylý saltanaty ótti.

Auto Space Detailing ortalyǵy 10 jyldan beri kólikterdiń ishin bezendirýmen aınalysyp keledi. Kóliktiń oryndyq jabdyqtary, 3D tósenishteri jáne basqa da ishki bezendirý jumystary osy ortalyqtyń negizgi baǵyty bolyp tabylady. Alaıda sońǵy bir jylda kóliktiń syrtyn árleý boıynsha jańa tehnologıany engizip otyr.

Bul jańa tehnologıany elimizge alǵash alyp kelgen kásipker Qumar Jumaqan kólikterdi robottardyń kómegimen boıaýdyń adamǵa da, ekologıaǵa da zıanyn tıgizbeıtinin atap ótti.

• "Osyǵan deıin kóliktiń ishin qamtamasyz etetin Qazaqstan men Qyrǵyzstan boıynsha jumys isteımiz. Birneshe shaǵyn ortalyqtarymyz bar. Al qazir biz sizderdi robottar kómegimen jasalatyn jańa ónimmen tanystyramyz. Robottandyrylǵan boıaý júıeleri – jasandy ıntellekt, kompúterlik kórý jáne avtomattandyrylǵan basqarý júıelerimen jabdyqtalǵan qurylǵylar. Olar kólik kýzovyn minsiz boıap, árleý jumystaryn sapaly jáne birkelki oryndaıdy. Boıaý búrký prosesi mıkrometrlik dáldikpen júzege asyrylyp, boıaý shyǵynyn azaıtýǵa jáne qorshaǵan ortaǵa zıan tıgizbeýge múmkindik beredi," – deıdi kásipker.

Jańa tehnologıanyń tusaýyn kásipkerdiń áriptesteri kesip, jyly lebizderin bildirdi.

• "Árbir kásipte tynbaı eńbek etseń, jetistikke jetesiń degendi Qumar baýyrymyzdan kórýge bolady. Avto moda kezinde tynbaı eńbek etip, júgirip júrgenin kórgenbiz. Bul deteılıngti ashatyn kezde de Qytaı men elimizdiń ortasynda izdenip, júgirip júrdi. Buryn qazaǵym attyń qulaǵynda oınasa, qazir temir tulpardyń qulaǵynda oınaıtyn boldy. Qumar baýyrymyz keremet jańalyqty tarıh jasap, elimizge ákelip jatyr," – deıdi dostary.

Jıyn barysynda kompanıa qyzmetkerlerine baspana syıǵa tartyldy. Sondaı-aq, kelýshilerge jańa tehnologıanyń jumys prosesi tolyqtaı tanystyryldy.

Tusaýkeser jıynynyń sońynda qatysýshylar arasynda lotoreıa oınatyldy. İ orynǵa 1 mıllıon 400 myń teńge turatyn avtokólikke qorǵanysh suıyq qabyqsha ornatatyn qyzmet usynylsa, İİ orynǵa 50 paıyz jeńildikpen,  al İİİ orynǵa 30 paıyz jeńildikpen avtokólikke kez kelgen qyzmet alý múmkindigi berildi.