Áleýmettik jelilerde UQSHU tóraǵasy Imanǵalı Tasmaǵambetovke qatysty aıyptaýlar taralǵan bolatyn. Keshe ol Qazaqstan azamattaryna málimdeme jasap, halyq aldynda júzi ashyq ekenin málimdedi.

Keıbir jeli qoldanýshylary Tasmaǵambetovtyń Ujymdyq qaýipsizdik týraly shart uıymy qyzmeti men elge degen adaldyǵyna kúmán keltirgen edi. Keıbiri ony «reseıshil», «satqyn» dep te aıyptady.

Imanǵalı Tasmaǵambetov osyǵan qatysty pikirin bildirdi.

«Áleýmettik jelige sengen keıbir adamdar úndemegendi basqa teýip, tabanyna tastaýǵa daıar, jaǵadan alyp, janyshtaýǵa qumar ekendigine kózim ábden jetti. Sondyqtan da azdy-kóp abyroı, atymdy bolymsyz ortanyń saýdasyna salmaı, barsha aıyp taqqysh jaranǵa bir jaýabyn bersem dep sheshtim», – dep ashyq aıtty.

Al ony «reseıshil» dep aıyptaǵandarǵa bylaı dep jaýap berdi:

«Týǵan jerine salmaǵy joq, jel aıdaǵan dánsiz qaýyz tárizdi keıbir baqytsyz jandar úshin men reseıshil, satqyn ekenmin. Sonda qalaı?! Kelisim sózdiń kúshi emes, zymyrannyń mysy basyp turǵan myna zamanda halyqaralyq áskerı uıymǵa týǵan elimniń atynan baryp, qaýipsizdik úshin otqa, múdde úshin sýǵa túskenim úshin be? Eger dál solaı bolsa, onda men zamanynda «orysshylsyń» dep aıyptalǵan uly Abaıdyń sózimen qaıyraıyn: «Adamnan nadan artpas uqqanmenen, Taǵdyr kórmeı qoımaıdy buqqanmenen» deıdi. Iaǵnı, júregiń azaptan jarylaıyn dep tursa da, qadirińdi bilmegenniń aldynda eńseńdi túsirme degen. Sondyqtan túsingenderdi baǵalap, túsinbegenderdi saralap ótetin ómir bul»,
– dedi Tasmaǵambetov.