Májilis  depýtaty Baqytgúl Hamenova Parlament palatalarynyń birikken otyrysyndaǵy sózinen keıin jeli qoldanýshylarynyń pikirin kóńiline almaıtynyn jetkizdi, dep habarlaıdy «Qamshy» portaly.

Osydan buryn Májilis depýtaty Baqytgúl Hamenova Astanaǵa Nursultan Nazarbaevtyń esimin berý jaıynda usynys jasaǵan edi, bul usynysynan keıin jeli qoldanýshylarynyń mazaǵyna aınaldy.

Alaıda, Hamenova hanym raıynan qaıtar emes. Bul joly depýtat halyqaralyq áýejaıǵa Nazarbaevtyń esimin berý máselesin kóterdi. Keıinnen jelide onyń sóılegen sózin Soltústik Koreıanyń júrgizýshi-dıktorlarymen salystyrǵan vıdeolar tarady.

«Men eki márte maslıhat depýtaty bolyp saılandym, búgin Májilistemin. Bárimiz et pen súıekten jaralǵanbyz. Árıne, bul qylyqtary kóńilime tıgenin moıyndaımyn. Halyq meni durys túsinbegen sekildi. Men jastyqqa kóz jasymdy malyp jyladym dep aıta almaımyn. Tek aradaǵy túsinispeýshilik kóńilime tıdi. Biraq, ýaqyt – emshi», - dedi Hamenova tilishilerge bergen suhbatynda.

 «Men Elbasyn súıemin. Prezıdentpen «kózimdi ashtym». Táýelsiz Qazaqstannyń urpaǵymyn. Nege men prezıdentimizge júrekjardy sózimdi aıta almaımyn? Árkimniń óz pikiri bolýy kerek jáne sen bulaı oılaı almaısyń dep eshkimge tyıym sala almaısyń. Siz tilshi retinde «bizdiń táýelsiz memlekette ómir súrýimiz birinshiden, Allanyń arqasy bolsa, ekinshiden, bizdiń dana Elbasymyzdyń arqasy» dep aıta alasyz ba?», - dep pikirin bildirdi depýtat.

Májilis depýtaty Nurlan Ábdirov aıtqandaı, astananyń atyn aýystyrý máselesi jazbasha túrde usynylmaǵandyqtan Konstıtýsıaǵa engizilmek ózgeristerdi talqylaý barysynda qaralmaǵan bolatyn.

Budan buryn Astanany «Nursultan» nemese «Nazarbaev» dep depýtattar tarapynan ózgertý máselesi talqylanǵan. Alaıda, prezıdent halyq pen depýtattarǵa sheksiz alǵysyn bildirip, bul oıdan bas tartýlaryn eskertken.