Qasym-Jomart Toqaevtyń tóraǵalyǵymen Parlament Senatynyń otyrysy ótti dep habarlaıdy Qamshy aqparattyq agenttigi.

Senatorlar Qazaqstan men Qyrǵyzstan arasyndaǵy tarıftik saıasat negizderin qosa alǵanda, temirjol kóligi kórsetetin qyzmetterge qol jetkizýdi retteý tártibin qoldaný týraly kelisimdi ratıfıkasıalady.

Qazaqstan men Qyrǵyzstan arasynda Sankt-Peterbýrgte 2016 jylǵy 26 jeltoqsanda qol qoıylǵan kelisim Tarıftik saıasat negizderimen birge temirjol kóligi kórsetetin qyzmetterge qol jetkizýdi retteıdi. Zań jobasyn qabyldaý temirjol kóligimen Qyrǵyzstanǵa qatysty tranzıttik júk tasymalyn quqyqtyq retteýdi qamtamasyz etedi. Qazaqstan men Qyrǵyzstan arasyndaǵy Kómek kórsetý jáne ony paıdalanýdy baqylaý tártibi týraly úkimetaralyq hattama ratıfıkasıalandy.

Hattamaǵa sáıkes kómek Qyrǵyz tarapyna: jabdyqtardy, taýarlar men kórsetiletin qyzmetterdi satyp alýǵa, qurylysqa aqsha qarajatyn aýdarý; jańa taýarlar jáne (nemese) jabdyqtar berý; oqytý boıynsha qyzmetterdi usyný arqyly berilýi múmkin.

Jabdyqtardy, taýarlar men kórsetiletin qyzmetterdi satyp alýǵa, qurylysqa aqsha qarajatyn aýdarǵan jaǵdaıda, Qyrǵyz Respýblıkasynyń ýákiletti organdary Qazaqstan tarapyna tıisti qujattardy: tehnıkalyq erekshelikti, baǵa usynystaryn, tehnıkalyq tapsyrmany, tehnıkalyq negizdemeni, jobalaý-smetalyq qujattamaǵa memlekettik saraptama qorytyndysyn aldyn ala jiberedi. Usynylatyn kómektiń nysanaly ári tıimdi paıdalanylýyn baqylaý maqsatynda Qazaqstan-Qyrǵyz úkimetaralyq Keńesi sheńberinde birlesken ekijaqty Revızıalyq komısıa qurylatyn bolady.

Sondaı-aq, 2016 jylǵy 26 jeltoqsandaǵy Qazaqstan men Qyrǵyz arasyndaǵy Kómek kórsetý jáne ony paıdalanýdy baqylaý tártibi týraly hattamaǵa ózgerister men tolyqtyrý engizý týraly úkimetaralyq hattama ratıfıkasıalandy.

Osy Hattamamen Kómek kórsetý jáne ony paıdalanýdy baqylaý tártibi týraly hattamanyń 6-babyna ózgerister men tolyqtyrý engiziledi.

Ózgeristerge sáıkes Qyrǵyz Respýblıkasynyń ýákiletti organy satyp alynatyn taýarlar, jabdyqtar, kórsetiletin qyzmetter men qurylys úshin – tehnıkalyq járdem kórsetý is-sharalarynyń tizbesin jáne tehnıkalyq ózindik ereksheliktiń, baǵa usynystarynyń, tehnıkalyq tapsyrmanyń, tehnıkalyq-ekonomıkalyq negizdemeniń, jobalaý-smetalyq qujattamaǵa memlekettik saraptama qorytyndysynyń bar ekendigi týraly qorytyndyny Qazaqstan Respýblıkasynyń búdjettiń atqarylýy jónindegi ýákiletti organyna usynady.

Engiziletin ózgeristerge deıin Qazaqstan tarapyna qajetti qujattamanyń bar ekendigi týraly qorytyndy ǵana emes, tolyǵymen barlyq qujattama usynylatyn bolady.

Qazaqstan men Qyrǵyzstan arasyndaǵy Tehnıkalyq járdem kórsetý týraly hattama ratıfıkasıalandy.

Eki el Úkimeti arasyndaǵy Eýrazıalyq ekonomıkalyq ıntegrasıa jaǵdaıynda ekonomıkalyq yntymaqtastyqty damytý týraly kelisimdi iske asyrý maqsatynda Eýrazıalyq ekonomıkalyq odaqtyń syrtqy shekaralaryn bekitýge 2 483, 8 mln. teńge (7 526,8 myń AQSH dollaryna barabar) somasynda kómektiń birinshi transhyn bólýdi kózdeıtin Hattama ázirlendi jáne oǵan qol qoıyldy.

Kómek Qyrǵyz tarapyna Belarýs Respýblıkasynyń, Qazaqstan Respýblıkasynyń jáne Reseı Federasıasynyń Keden odaǵy men Biryńǵaı ekonomıkalyq keńistigine Qyrǵyz Respýblıkasynyń qosylýy jónindegi «jol kartalary» is-sharalaryn qarjylandyrý úshin beriledi.

2016 jylǵy 26 jeltoqsandaǵy Qazaqstan Qyrǵyzstan arasyndaǵy Tehnıkalyq járdem kórsetý týraly hattamaǵa ózgerister engizý týraly úkimetaralyq hattama ratıfıkasıalandy.

Qujatpen Qazaqstan men Qyrǵyzstan arasyndaǵy Hattamanyń 1-babyna kómek somasyn 41 038,1 myń AQSH dollaryna deıin ulǵaıtý bóliginde ózgeris engizilgen. Atalǵan kómek Qyrǵyz Respýblıkasynyń EAEO-qa qosylýy jónindegi «jol kartasynda» kózdelgen keden jáne kóliktik ınfraqurylym, tehnıkalyq retteý, sanıtarıalyq-epıdemıologıalyq qadaǵalaý, aqparattyq ózara is-qımyl, fıtosanıtarıa jáne veterınarıa sıaqty salalardaǵy is-sharalardy qarjylandyrý arqyly Eýrazıalyq ekonomıkalyq odaqtyń syrtqy shekarasyn nyǵaıtýǵa baǵyttalǵan. Zańnamalyq aktilerine elektr energetıkasy máseleleri boıynsha ózgerister men tolyqtyrýlar eki oqylymda qaralyp, qabyldandy.

Zań jobasynyń maqsaty elimizdiń óńirlik energetıkalyq kompanıalardy irilendirý kezinde týyndaıtyn qoǵamdyq qatynastardy retteıtin zańnamasyn jetildirý bolyp tabylady.

Zań jobasy elektr energıasyn tutynýshylardyń quqyqtaryn qorǵaýǵa jáne energetıkalyq kásiporyndar kórsetetin qyzmetterdiń sapasyn qamtamasyz etýge baǵyttalǵan. Qujatpen on bir zańnamalyq aktige, onyń ishinde «Salyq jáne búdjetke tólenetin basqa da mindetti tólemder týraly» kodeksine (Salyq kodeksi), Ákimshilik quqyq buzýshylyq týraly, Jer, Sý kodeksterine, sondaı-aq birqatar zańdarǵa túzetýler engiziledi. Zań jobasymen ıesiz dep tanylǵan elektr jelilerin energıa berýshi uıymdarǵa berý jáne olardy korporatıvtik tabys salyǵynan jáne múlik salyǵynan birjolǵa bosatý reglamentteledi. Sonymen qatar, zań jobasymen tabıǵı monopolıalardy retteý jáne retteletin naryqtar salasyndaǵy ýákiletti organnyń energıa beretin uıymdardyń elektr jelilerin balansyna nemese senimgerlik basqarýǵa qabyldaǵan jaǵdaıda rettelip kórsetiletin qyzmetterine tarıfterdiń shekti deńgeıin qaıta qaraý jónindegi quzyreti belgilenedi.

Zań jobasynyń sheńberinde elektr energetıkasy salasyndaǵy ýákiletti organnyń Qazaqstan Respýblıkasynyń birtutas elektr energetıkalyq júıesinde elektr energıasynyń tapshylyǵy men profısıtin aıqyndaý qaǵıdalaryn ázirleýi jáne bekitýi kózdeledi. Jergilikti atqarýshy organdarǵa jylytý maýsymyn irkilissiz ótkizý úshin energıa óndirýshi uıymdarǵa otyn satyp alýǵa sýbsıdıa berý jónindegi quzyret beriledi. Sondaı-aq elektr energetıkasy salasyndaǵy ákimshilik quqyq buzýshylyqtyń jańa quramdary engiziledi.

Zań jobasymen elektr energıasyn óndirýdiń ózindik qunynan tómen emes baǵa boıynsha jáne eldiń birtutas elektr energetıkalyq júıesinde elektr energıasynyń profısıti jaǵdaıynda ǵana Qazaqstan Respýblıkasy eksporttaıtyn, al tapshylyq jaǵdaıynda ǵana ımporttaıtyn elektr energıasyna shekteý belgilenedi. Aýksıondyq saýda-sattyq engizý arqyly jańartylatyn energıa kózderin paıdalaný salasyna ınvestısıalar tartý tetigin jetildirý kózdeledi.

«Qazaqstan Respýblıkasynyń keıbir zańnamalyq aktilerine jergilikti ózin ózi basqarýdy damytý máseleleri boıynsha ózgerister men tolyqtyrýlar engizý týraly « zań jobasyna Parlament Senaty men Májilis arasyndaǵy kelispeýshilikti eńserý jónindegi kelisý komısıasymen ázirlengen túzetýler engizildi.

Joǵarǵy Palatanyń otyrysynda Respýblıkalyq búdjettiń atqarylýyn baqylaý jónindegi esep komıtetiniń múshesi Aleksandr Goráınovtyń óz ótinishimen otstavkaǵa jiberý jóninde bergen ótinishi qanaǵattandyryldy.

Respýblıkalyq búdjettiń atqarylýyn baqylaý jónindegi esep komıtetiniń múshesi bolyp Senattyń Qarjy jáne búdjet komıtetiniń tóraǵasy Rashıt Ahmetov taǵaıyndaldy.

Senator Sársenbaı Eńsegenov Premer-mınıstr Baqytjan Saǵyntaevtyń atyna «Ýralskagroremmash» aksıonerlik qoǵamyna qatysty máselelerdi sheshýge yqpal etýdi jáne mamandandyrylǵan avtotehnıkany óndirýdi keńeıtýge jáne qoldaýǵa baılanysty máseleni jan jaqty qarastyryp sharalar alýdy usynǵan depýtattyq saýalyn joldady.