Mınnesotanyń 19 jastaǵy turǵyny Monalıza Peres You tube arnasyna arnaıy vıdeo túsirý sátinde 22 jastaǵy jigiti Pedro Rýızdi baıqamaı óltirip qoıǵan. Bul týraly Bı-bı-sı jańalyqtar qyzmeti habarlaıdy.
Jergilikti polıseı qyzmetkerleriniń málimetinshe, jup beınebaıan túsirmekshi bolǵan. Senarı boıynsha, Peres qalyń kitap ustap turǵan jigiti Rýızge oq atýy tıis edi, alaıda oq kitaptan ótip ketedi. Óz eksperımentteri úshin olar muqabasy qalyń ensıklopedıa kitaby men Desert Eagle iri kalıbrli tapanshasyn paıdalanǵan.
Beınebaıan túsirý úshin jastar bólmege eki kamera ornatty. Baıqaýsyzda bolǵan qylmystyń kýágerleri úsh jasar búldirshin men «trúkti» tamashalaýǵa kelgen 30 shaqty kórshileri boldy.
Peres oq atqanda, oq kitapty tesip, Rýızdiń ishine tıedi. Esi shyqqan qyz bala birden 911-ge habarlasady, alaıda jigittiń ómirin saqtap qalý mumkin bolmady.
Peres polıseı qyzmetkerlerine túsinikteme bererde YouTube arnasyna vıdeo túsirý Rýızdiń ıdeıasy bolǵanyn aıtady. Qaıǵyly oqıǵa oryn almas buryn qyz bul jaıynda óziniń Tvıtter paraqshasyna jazady.
«Biz Pedro ekeýmiz asa qaýipti vıdeo túsirmekshimiz. Bul meniń emes, onyń ıdeıasy», dep jazdy Peres.
Túsirmek bolǵan vıdeo arqyly jas jup ózderiniń YouTube arnasynyń tanymaldylyǵyn arttyryp, tirkelýshiler jınamaq bolǵan.
Tanystarynyń aıtýynsha, ekeýi bir-birin qatty súıgen, ári dál osylaı bolmaýy tıis edi.
Jup YouTube arnasyndaǵy jeke vıdeoblogtaryn 2017 jyldyń naýryzynda ashqan. Maqsattary – adamdarǵa «erte ata-ana atanǵan jas juptyń» ómirin kórsetý.
7 aıǵa aıaǵy aýyr Monalıza Pereske 10 jylǵa bas bostandyǵynan aıyrý men 20 myń dollar aıyppul tóleý qaýpi tónip tur.
Búginde qyzdy 7 myń dollar kepil aqshamen úıine bosatty. Sot 5 shilde kúni ótpek.
Sholýshy: Sabına Ramazan
