Taıaýda ǵana elimizde mektep túlekteriniń ulttyq biryńǵaı testileýi aıaqtalǵany belgili. Alaıda, synaqqa qatysqandardyń barlyǵy birdeı tıisti mejeni baǵyndyra almady. Sondaı túlekterge, ıaǵnı UBT-ǵa qatyspaǵan jáne shektik deńgeıge jete almaǵan jastarǵa qoldaý kórsetip, ómirden óz ornyn tabý úshin jón silteý maqsatynda byltyr «Nur Otan» partıasy Elbasynyń tapsyrmasymen «Sátti qadam» jobasyn qolǵa alǵan bolatyn. Bıyl da atalǵan bastama óz jalǵasyn tappaq.

Soǵan oraı búgin «Nur Otan» partıasynyń Ortalyq apparatynda «Sátti qadam» partıalyq jobasynyń úshinshi baǵytyn júzege asyrý maqsatynda «Nur Otan» partıasy men Bilim jáne ǵylym mınstrligi, Eńbek jáne halyqty áleýmettik qorǵaý mınıstrligi jáne Din isteri jáne azamattyq qoǵam mınıstrlikteri arasynda jańartylǵan tórtjaqty memorandýmǵa qol qoıyldy.

Otyrys «Nur Otan» partıasy Tóraǵasynyń Birinshi orynbasary Muhtar Qul-Muhammedtiń tóraǵalyǵymen ótti. Sharaǵa atalǵan mınıstrlik basshylary Erlan Saǵadıev, Tamara Dúısenova, Nurlan Ermekbaev pen jaýapty memlekettik organdar ókilderinen qurylǵan jumys tobynyń músheleri, partıanyń óńirlik fılıaldary men «Jas Otan» Jastar qanatynyń ókilderi qatysty.

Jobanyń mańyzy jóninde aıtqan Muhtar Qul-Muhammed: «Elbasymyzdyń tapsyrmasyn oryndaý úsh úlken máseleniń túıinin sheshýge múmkindik beredi: mektep bitirgen jastar memlekettiń qamqorlyǵyn sezinip, birden jumyspen qamtylady; mamandyq ıgeredi jáne jańadan ashylǵan kásiporyndar jumys kúshimen qamtamasyz etiledi. Birde bir mektep bitirýshi bizdiń nazarymyzdan tys qalmaýy kerek. Bul qoǵamǵa da, memleketke de óte paıdaly is», – dedi.

Jobanyń ótken jylǵy kórsetkishterine kóz júgirter bolsaq, UBT-ǵa qatyspaǵan jáne shekti deńgeıdi jınaı almaǵan mektep túlekteriniń jalpy sany 54172 jasty qurady. Qaıta testileýdiń arqasynda 13514 túlek qazaqstandyq jáne 5820 túlek sheteldik bilim berý oryndaryna oqýǵa oqýǵa tústi. Sondaı-aq, 22526 túlek Kásiptik jáne tehnıkalyq bilim berý uıymdaryna jáne daıarlaý kýrstaryna tússe, 1006 jas ásker qataryna shaqyrylǵan. Al 1408 túlek óz kúshterimen jumysqa ornalasty. Bıyl da bas partıanyń qoldaýymen synaqtan súringen jastarymyz ómirdiń bir ketigine kirpish bolyp qalanady degen senimimiz mol.