Eýropadaǵy qaýipsizdik jáne yntymaqtastyq uıymynyń parlamenttik assambleıasy (EQYU PA) Kıev usynǵan «Ýkraınanyń egemendigi men terıtorıalyq tutastyǵyn qalpyna keltirý» týraly qarar qabyldaǵan. Bul týraly Qamshy.kz Azattyq radıosy aqparatyna súıenip habarlaıdy. Reseı bul qarardy qabyldaýǵa qarsy bolǵan.
EQYU PA qararynda "Ýkraınanyń egemendigin, táýelsizdigin, birligin jáne onyń Qyrym avtonomıalyq respýblıkasy men Sevostopol qalasy qosa kiretin, halyqaralyq qaýymdastyq tanyǵan shekara kólemindegi terıtorıasynyń tutastyǵyn tolyq qurmetteıtini" týraly málimdegen.
Sonymen birge qujatta "Reseı federasıasynyń Qyrym avtonomıalyq respýblıkasy men Sevostopol qalasyn ýaqytsha okýpasıalaýyn jáne Reseıdiń Donbasta Ýkraınaǵa qarsy jalǵastyryp jatqan gıbrıdtik agresıasyn aıyptaıtyny" aıtylǵan.
Buǵan qosa EQYU PA "Reseı federasıasyn reseı-ýkraın memlekettik shekarasynyń úkimettiń baqylaýynan tys bóligi arqyly adamdar, aqsha, qarý-jaraq jóneltý arqyly Ýkraınadaǵy terrorlyq qyzmetke demeýshilik jasaýdy doǵarýǵa jáne Ýkraına jerinde teraktiler jasap otyrǵan Ýkraınanyń Donesk men Lýgansk oblystarynyń jekelegen aýdandaryndaǵy zańsyz qarýly qurylymdarǵa kez-kelgen qoldaýdy tyıýǵa tabandylyqpen shaqyratyny" týraly málimdegen.
Sondaı-aq qujatta EQYU PA Reseıdi "Ýkraınanyń Donesk jáne Lýgansk oblystarynyń jekelegen aýdandaryndaǵy qarýly qurylymdaryn, áskerı tehnıkasy men jaldamaly sarbazdaryn shyǵarýdy qamtamasyz etýge" shaqyratyny jazylǵan.
Reseı 2014 jyly kóktemde Ýkraına quramyndaǵy Qyrym túbegin áýeli áskerin jiberip, keıin 16 naýryzda "referendým" ótkizý arqyly ózine qosyp alǵan. BUU Bas assambleıasy Reseıdiń Qyrymdy aneksıalaýyn kópshilik daýyspen zańsyz dep tanyǵan. Ýkraına shyǵysynda 2014 jyldyń kókteminen beri jalǵasyp jatqan úkimet kúshteri men reseıshil separatıster arasyndaǵy qarýly qaqtyǵys saldarynan úsh myńnan astam beıbit turǵyn qaza tapqan.
Batys elderi Máskeýdiń Qyrymdy aneksıalaýyna jáne Shyǵys Ýkraınadaǵy janjalda separatısterge qoldaý bildirgenine baılanysty Reseıge qarsy sanksıalar salǵan.
