Senat depýtaty Sársenbaı Eńsegenovtiń Atyraý oblysyndaǵy sapary jalǵasýda dep habarlaıdy Qamshy aqparattyq agenttigi. 10 shildede Reseı shekasyndaǵy Azǵyr aýyldyq okrýginde bolǵan senator óńir turǵyndarymen kezdesti.

Sársenbaı Eńsegenov jáne birqatar memlekettik organdardyń ókilderi keńes odaǵy kezinde 17 jer asty ıadrolyq synaq ótkizilgen «Azǵyr» polıgonyn tik ushaqpen ústinen ushyp qarap shyqty.

Depýtat pen is-sharaǵa qatysýshylar Qazaqstan-Reseı shekarasynda ornalasqan «Balqudyq» baqylaý-ótkizý beketine bardy.

Turǵyndarmen «Balqudyq» aýyldyq mádenıet úıinde ótken kezdesýge Atyraý oblysy ákiminiń orynbasary Sálimjan Naqpaev, Qurmanǵazy aýdanynyń ákimi Bıboz Shaıahmetov, birqatar mınıstrlikter men Ulttyq qaýipsizdik komıteti shekaralyq qyzmetiniń ókilderi qatysty.

Shara barysynda óńirdiń áleýmettik-ekonomıkalyq damýyna baılanysty Jol kartasynyń oryndalýy týraly másele qaraldy. Sonymen birge Balqudyq-Qarabaly shekaradan ótý ornyn eki jaqty avtomobıl ótý pýnktine aýystyrý týraly atqarylǵan jumystar talqylandy.

Óńir turǵyndarymen kezdesý barysynda áleýmettik máseleler, onyń ishinde aýyz sý tapshylyǵy da sóz boldy. Aımaq turǵyndary sý qubyryn salýdy aıaqtaý týraly talaptaryn jetkizdi.

Kezdesý barysynda jergilikti halyqqa "Azǵyr" polıgonynda ornalasqan Reseıdiń №13 Ia "IaVA" qondyrǵysy týraly aqparat berildi.