Tıisti shartqa Ulttyq poshta operatory delegasıasynyń Qytaıǵa sapary barysynda «Qazposhta» AQ jáne China Post Group ókilderi búgin qol qoıdy dep habarlaıdy Qamshy.kz aqparat agenttigi.
«Elektrondyq komersıa naryǵynyń álemdegi jyl saıynǵy ósý qarqyny 30%-dan astam jáne negizgi ósý draıverleriniń biri qytaı ınternet-alańdary. QR kiris poshtasynyń jalpy kólemindegi qytaı sálemdemeleriniń úlesi 60%-dan artyq jáne jyldan-jylǵa artyp keledi. Eger 2014 jyly ol 2,5 mln. danaǵa jetken bolsa, al 2015 jyly 3,6 mln. danaǵa deıin ósti, bul kórsetkish ótken jyly 4 mln. danany qurady. Biz 2017 jyldyń birinshi toqsanyndaǵy poshta kóleminiń 2016 jylǵy 1 toqsanmen salystyrǵanda 2 ese óskendigin baqyladyq (0,8 mln. danadan 1,6 mln.-ǵa)», – dep atap ótti Qazposhta basshysy Saken Sarsenov.
«Sálemdemelerdi jetkizý merzimi turǵysynda da damýǵa nıettimiz jáne aldaǵy kúnderi servıs sapasyn arttyrý úshin qytaı tarapyna da merzimdi eki ese qysqartýǵa usynys jasadyq jáne QHR-da qabyldanǵan sátinen bastap, QR-da berilgen sátke deıin shamamen 18 kún bolmaq», – dedi ol.
Sondaı-aq qytaılyq tarapqa trekıng servısin jaqsartý jáne eki el poshtasynyń arasynda 100% AT-ıntegrasıa júrgizý, EDI oqıǵalary elektrondyq derekterin jóneltýshi men alýshynyń mekenjaı derekterimen almasýdy jolǵa qoıý usynyldy.
Aıta keteıik, Qazposhta CPEL (China Post Express Logistic) ókilderimen birigip, Qytaıdan keletin shaǵyn jóneltimder úshin EPAKET jańa ekspress-ónimin jasap shyǵardy, ol DHL, Fedex sıaqty alpaýyttarmen jáne basqa da kýrerlik kompanıalarmen básekelese alady. Bul, álbette, qazirgi ýaqytta jóneltimderdiń jalpy kóleminiń 1%-na da jetpeıtin ekspress-jóneltimderiniń (EMS) úlesinde oń kórinis beredi.
Sonymen qatar, Qazposhta basshysy Saken Sarsenov Alibaba, «Jumore», E2B (Enterprise to Business) kompanıalar toby basshylarymen, sondaı-aq logıstıka salasyndaǵy SF Express – QHR-daǵy eń iri logıstıkalyq kompanıanyń basshysymen ekijaqty kezdesýler ótkizdi. Kezdesýler aıasynda aldaǵy ekijaqty yntymaqtastyq jónindegi naqty jobalar belgilendi.
Eske sala keteıik, ótken jyly Qazaqstan Respýblıkasynyń Prezıdenti N.Nazarbaev «Úlken jıyrmalyq» elderi samıtinde QHR basshysymen eki el yntymaqtastyǵyn tereńdetý jóninde, atap aıtqanda, Jibek joly ekonomıkalyq beldeýin qurý týraly ıdeıasyn aıta otyryp, elderdiń tranzıttik-logıstıkalyq áleýetin damytý týraly ekijaqty kezdesýler ótkizgen bolatyn. Osy oraıda aıtyp ótken jón, Jibek joly beldeýin jańǵyrtý jónindegi osy bastama elimizdiń tranzıttik áleýetin tolyqtaı ashýǵa baǵyttalǵan Qazaqstannyń «Nurly jol» jańa ekonomıkalyq saıasatyna ulasady.
