Qazaqstan Prezıdenti elimizge saparmen kelip, «EKSPO-2017» halyqaralyq kórmesinde Ispanıa pavılonynyń ashylýyna qatysqany úshin A.Pastorǵa alǵys aıtty, dep jazady Qamshy.kz aqparat agenttigi.

– Kórmemizdiń ashylý saltanatyna 17 shet memleket jáne úkimet basshylarymen birge, Ispanıa Koroli VI Felıpe de qatysqan bolatyn. Biz osy is-shara aıasynda júzdestik. Asa mártebeli Ispanıa Koroli Qazaqstanǵa qyzyǵýshylyq tanytyp, birqatar iskerlik kezdesý ótkizdi, – dedi Memleket basshysy.

Nursultan Nazarbaev elderimiz arasynda ekijaqty dostyq qarym-qatynas ornaǵanyn, ekonomıka men saıasattaǵy baılanystarymyz jemisti damyp kele jatqanyn aıtyp, halyqaralyq kún tártibindegi máseleler boıynsha ustanymdarymyz uqsas ekenine toqtaldy.

– Qazaqstanǵa sapary kezinde Asa mártebeli Ispanıa Korolimen birge Ispanıanyń isker toptar ókilderi men úkimet músheleri keldi. Olar Qazaqstandaǵy áriptesterimen jemisti kelissózder ótkizdi, – dedi Qazaqstan Prezıdenti.

Memleket basshysy Ispanıa Koroli Vİ Felıpe men úkimetine joǵary marapaty úshin jyly lebizin joldap, Koról İ Hýan Karlos pen onyń jubaıy Sofıa Patshaıymǵa amandyq jáne tabys tiledi.

Ispanıa Koróldigi Depýtattar kongresiniń tóraıymy eki memleket arasynda dostyq qarym-qatynas ornaǵanyn aıtyp, Ispanıa delegasıasyna dástúrli túrde qonaqjaılyq kórsetkeni úshin rızashylyq bildirdi.

– Men Sizdiń elińizdi damytý men órkendetý jolyndaǵy qyzmetińiz, kúsh-jigerińiz týraly alǵash ret Ispanıa Koroli İ Hýan Karlostan estidim. Dál sol kezde Ispanıa Koroli İ Hýan Karlos Qazaqstandaǵy áriptesterimizben iskerlik baılanystar ornatý qajettigin aıtqan bolatyn. Búginde Qazaqstan Sizdiń arqańyzda zor tabysqa qol jetkizip otyr, – dedi A.Pastor.

Budan bólek, Ispanıa Koróldigi Depýtattar kongresiniń tóraıymy Qazaqstan Prezıdentine Ispanıa Koroli otbasynyń jyly lebizin jetkizdi.