Amerıka men Soltústik Koreıa arasyndaǵy shıelenisken baılanys AQSH pen  Japonıa arasyndaǵy  áskerı kelisimniń nyǵaıýyna sebep boldy. Bul týraly Qamshy.kz aqparat agenttigi Golos Amerıkı málimetine súıenip habarlaıdy.

«Soltústik Koreıamen aradaǵy kúrdeli máselege baılanysty AQSH pen Japonıa arasyndaǵy áskerı yntymaqtastyqty nyǵaıtý boıynsha jumystar júrgizilýde. Sonymen qatar, Japonıadaǵy Amerıka áskeriniń kúsh qýatyn arttyrýdy josparlap otyrmyz», – dep málimdedi AQSH-tyń Qorǵanys mınıstri Djeıms Mettıs.

Aǵymdaǵy aptada Soltústik Koreıalyq BAQ betterinde eldiń kóshbasshysy Kım Chen Yn «ýaqytsha» balıstıkalyq zymyran ushyrýdy toqtatatyny týraly habarlanǵan bolatyn.

Sonymen qatar, Phenánnyń ses kórsetýi Japonıa men AQSH ókilderiniń kezdesýi barysynda basty qozǵalǵan taqyryp boldy. AQSH jaǵynan kelissózge eldiń qorǵanys mınıstri Djeıms Mettıs pen Memlekettik departament basshysy Reks Tılerson qatysty.

Kelissózder nátıjesinde AQSH Japonıa jerine óziniń eń kúshti, zamanaýı qarýlaryn ornalastyrady. Al oǵan jaýap retinde Japonıa óziniń qorǵanysyn kúsheıtedi.

Japonıanyń Syrty ister mınıstri Tero Kononyń aıtýynsha, Japonıa aldaǵy ýaqytta Shyǵys Azıadaǵy qorǵanys salasyndaǵy kemelerge 500 mıllıon dollar jumsamaqshy.

Aıta ketsek, aldaǵy dúısenbide AQSH pen Ońtústik Koreıanyń áskerıleri birlesken oqý-jattyǵýlaryn ótkizedi.