OQO Saıram aýdandyq soty 27 jastaǵy turǵyndy áleýmettik jeli arqyly azamattardy Sırıaǵa barýǵa úgittegeni úshin 5 jylǵa bas bostandyǵynan aıyrdy dep habarlaıdy Qamshy.kz aqparat agenttigi kazislam.kz saıtyna silteme jasaı otyryp.

Sýdıa Saltanat Qabylova sot barysynda Ábilqasym Qajyrhanovtyń uıaly telefon arqyly áleýmettik jelilerde terorızmdi nasıhattaǵany úshin sottalatynyn aıtty. Ol QR Qylmystyq kodeksiniń 256 baby 2 bóligimen «Terorızmdi nasıhattaý nemese terorızm aktisin jasaýǵa jarıa túrde shaqyrý» áreketi boıynsha kináli dep tanylyp, 5 jylǵa bas bostandyǵynan aıyryldy. Jazany óteý merzimi 2017 jylǵy 20 sáýirge belgilendi.

Eske salaıyq, tergeý barysynda aıyptalýshy VKontakte áleýmettik jelisine tirkelip, uzaq ýaqyt ekstremıstik nasıhat jumystaryn júrgizgen. Ol qasıetti musylmandar soǵysyna qatysýǵa, ekstremıstik toptarǵa qoldaý kórsetýge shaqyratyn materıaldar salyp otyrypty. Taıaý Shyǵys pen Sırıada jıhad jasaýǵa úgittegen. Onyń ákesi de osyndaı zańǵa qaıshy áreketi úshin jazasyn óteýde eken.