Kachır aýdany Trofımovka aýylynyń turǵyny Berik Ábdirahman «EKSPO-2017» halyqaralyq kórmesine velosıpedpen baryp keldi, dep jazady Qamshy.kz aqparat agenttigi.
Jergilikti pavlodarnews.kz portalynyń málimetine súıensek, 39 jastaǵy aýyl turǵyny 26-shilde kúni elordaǵa attanyp, 8-tamyzda Pavlodarǵa oralǵan. Osylaısha, 1013 shaqyrymdy velosıpedpen baǵyndyryp, 13 kúnniń tórt táýligi jol júrýge ketken. Qaıtar jolda ǵana jumysyna úlgerý maqsatynda Astanadan Pavlodarǵa qatynaıtyn poıyzǵa otyrǵan. Ustazdyń aıtýynsha, saparǵa shyqpas buryn 1984 jyly shyqqan keńestik «Ýral» markaly velosıpedin aýystyrmaq bolǵan. Degenmen sońǵy sátte uzaq jyldar boıy syr bermegen kóligin almastyrý týraly oıdan bas tartyp, arnaıy navıgasıasy bar velokompúter jáne velosıpedshiniń kıimin alǵan.
«Kórme ótetini jaıly estigen sátten bastap ózime osyndaı maqsat qoıdym. Bul meniń velosıpedpen shyqqan eń uzaq saparym. Buǵan deıin 2015 jyldan bastap Tereńkólge, Trofımovkaǵa jáne Aqsýǵa barǵan edim. Osy sapardan alǵan áserimdi sózben aıtyp jetkizý múmkin emes. Halyqarlyq kórmeniń bizdiń elimizde ótip jatqany zor mártebe. Jolda aq jol tilep, óz kómegin usynǵan jandar kóp boldy», - deıdi ol.
Aıta keteıik, Berik Ábdirahman 17 jyldan beri Trofımovka aýylynyń mektebinde qazaq tili men ádebıeti páninen sabaq beredi. Sırek kezdesetin júrek aýyrýyna shaldyqqan ustaz boıyndaǵy dertin jeńý úshin 10 jyldan astam ýaqytyn jattyǵýǵa arnap, sportpen aılanysýǵa bet burǵan. Aldymen arnaıy ádis boıynsha 800 metr qashyqtyqtan júgirýdi bastasa, sońǵy eki jylda bul kórsetkishti toǵyz shaqyrymǵa jetkizgen. Tipti, aptap ystyqqa qaramastan, Ramazan aıynda aýyz bekitip, jańadan salynǵan Orta Azıadaǵy eń úlken kópir arqyly velosıpedpen júrip ótken.
