Qazaqstandyq boksshylary arasynda, onyń ishinde ózimizdiń qarakózder qataryndaǵy biri de biregeıi Janqosh Turarov shyǵar. Jastaıynan úzdik shyǵýǵa talpynyp, bilegin bekitip, kásibı sportqa, onyń ishinde boksqa den qoıǵandardyń ishindegi Amerıka asyp, óz betimen Las-Vegasta rıngte atoı salǵan az qandastarymyzdyń da biri osy – Janqosh.

Árıne, sharshy alańǵa shyqqannan keıin álemde úzdik atanýdy armandamaıtyn sportshy joq. Janqosh ta balalyq shaǵynan óz aldyna osyndaı asqaq mindet qoıǵan eken. Qazir ol sol bıik armanyna jetý úshin ter tógip júr jáne «Men Álem chempıony bolamyn!» degen ýádesin oryndaýdyń aldynda tur. Taıaýda otandyq saıttardyń birine bergen suhbatynda ol: «Armanyma jetýge sál ǵana qaldy», – dep ashyǵyn aıtqan bolatyn.

Ol kásibı rıngtegi eń este qalarlyqtaı jekpe-jegin Otanymyzda, «Almaty-Arena» sport saraıynda ótkizgenin maqtanyshpen eske alady. «18 myńǵa jýyq jankúıerler jınaldy. Bári de «Janqosh – jeńimpaz» dep bir adamdaı urandaǵandaǵy tolǵanysymdy, ishki jan-dúnıemniń aýdarylyp túskenin sózben jetkize almaımyn. Munyń qandaı baqyt ekenin bilseńiz ǵoı», – dep aǵynan jarylady ol.

Janqosh Qazaqstanda sporttyń damýyna Elbasy zor qoldaý kórsetip otyrǵanyn atap kórsetti, sol úshin Nursultan Nazarbaevqa alǵysyn jetkizdi. "Memleketimiz basshysynyń osyndaı saıasaty arqasynda QR Mádenıet jáne sport mınıstri A. Muhamedıuly qazaqstandyq sportty jáne boksty da odan ári damytý maqsatynda bolashaǵy zor baǵdarlamalardy júzege asyrýda", – deıdi jeńimpaz boksshy.

– Arystanbek Muhamedıulynyń ózi mınıstr bolyp jumys istep jatqan kezeń aralyǵynda qazaq sportyn kóterý jolynda qyrýar eńbek sińirdi. Álemdik, Azıa qurlyǵy birinshilikterinde de bizdiń sportshylar óte joǵary kórsetkishterge qol jetkizdi. Mádenıet salasynda da búkil elimiz boıynsha máni zor, aýqymdy sharalar, konsertter ótkizildi. Bári de asa joǵary deńgeıde uıymdastyryldy. Osynyń barlyǵy da mınıstrdiń tikeleı qoldaýy nátıjesinde júzege asýda, – deıdi Janqosh Turarov.

Dál qazir ol halyqaralyq «EKSPO-2017» kórmesi aıasyndaǵy 9-shy qyrkúıekte otandyq bylǵary qolǵap sheberleri kóshbasshylarynyń biri Qanat Islamnyń belgili kanadalyq boksshy Brendon Kýkqa qarsy ótkizetin kásibı boks keshine qatysýǵa qyzý daıarlyq ústinde.