23 tamyzda Tájikstan parlamentiniń tómengi palatasy "Dástúr men saltty retteý týraly zańǵa" ózgeris engizip, el azamattaryna ulttyq kıim kıýdi mindettedi. Bul týraly Qamshy.kz aqparat agenttigi Azattyq radıosynyń málimetine súıenip habarlaıdy.
Zańnyń 14-babynyń 4-bólimine jasalǵan ózgeriske sáıkes "jeke jáne zańdy tulǵalar ulttyq kıim atrıbýttaryn saqtap, memlekettik tildi bilýge jáne ulttyq kıim kıip júrýge mindetti bolady".
Parlamenttiń otbasy men áleýmettik qorǵaý komıtetiniń tóraıymy Hılolbı Kýrbonzoda 23 tamyzda bul zańdy oryndamaǵandardyń jazaǵa tartylatynyn aıtty. Onyń sózinshe, Tájikstan úkimeti jaqyn arada ulttyq kıim kıip júrý tártibine qatysty arnaıy qaýly ázirlemekshi.
Jergilikti sarapshylar osyndaı jolmen bılik organdary hıdjab kıetin musylman áıelderge ulttyq kıimdi tańbaqshy dep sanaıdy. Tájikstan úkimeti buǵan deıin birneshe márte hıdjabqa qarsy naýqan jarıalaǵan. Bılik ókilderi zańǵa engizilgen jańa ózgertý hıdjabqa qarsy emes ekenin, "tájikterdiń ulttyq mádenıeti men dinine qaıshy ádepsiz" kıiný úlgilerine qarsy jasalǵan shara ekenin aıtady.
