Tamyzdyń 28-i Májilis tóraǵasy Nurlan Nyǵmatýlın QR Parlamenti Palatalarynyń birlesken otyrysyn shaqyrý týraly Ókimge qol qoıǵan bolatyn. Otyrys qyrkúıektiń 4-i saǵat 11-de bastaldy. Sonymen qazir Qazaqstannyń Parlament Palatalarynyń birlesken otyrysy ótip jatyr.

Otyrysta Senat spıkerin saılaý nemese burynǵy spıkerdi qaıta saılaý máselesi qaralady dep kútilýde. Qasym-Jomart Toqaevtyń depýtattyq ókilettilik merzimi qarasha aıynda aıaqtalatyny belgili. Maýsymnyń 28-i kúni ótken Senat depýtattary saılaýynda saılanǵan Joǵarǵy Palatanyń jańa músheleri de jumystaryna búginnen bastap kirisetini taǵy bar. Osyǵan baılanysty «Toqaev qyzmetin saqtap qala ma?» degen saýal týyndaıdy. Sonymen qatar, Elbasy Joǵarǵy Palatanyń jańa 7 depýtatyn taǵaıyndaýy múmkin. Eki aı buryn saıası salmaǵy aýyr tulǵalardyń biri – Nurtaı Ábiqaevtyń depýtattyq ókilettiligi toqtatylǵany belgili.

Senattyń spıkeri bolyp «Astana EKSPO-2017» ulttyq kompanıasynyń basshysy Ahmetjan Esimov taǵaıyndalýy múmkin degen áńgimeler de Sol jaǵalaýdy kezip júrgeni aıan. "Qasym–Jomart Toqaev óz qyzmetin jaqsy atqaryp júr, ári, Qazaqstannyń ishki-syrtqy saıasatyn tereń biletin, Elbasynyń senimdi de adal nókerleriniń biri bolyp tabylady, sondyqtan da ol óz qyzmetin saqtap qalady. Buǵan sarapshylardyn kúmáni joq. Toqaev memlekettik saıası bılikte "ekinshi adam" bolyp qala bermek."

Nurǵalı Nurtaı