Búgin Memleket basshysy Nursultan Nazarbaev altynshy saılanǵan Qazaqstan Respýblıkasy Parlamentiniń úshinshi sesıasyn ashty, dep habarlaıdy Qamshy.kz aqparat agenttigi.

Otyrysqa Senattyń 46 depýtaty, Májilistiń 106  depýtaty, QR Úkimet músheleri, Joǵarǵy sot, Konstıtýsıalyq keńesi, Ortalyq saılaý komısıasy tóraǵalary, QR Prezıdentine tikeleı baǵynatyn jáne esep beretin memlekettik organdardyń, ulttyq basqarýshy kompanıalardyń basshylary qatysýda.

Qazaqparattyń málimetine súıensek, altynshy saılanǵan QR Parlamentiniń úshinshi sesıasyn ashý barysynda sóz sóılegen QR Prezıdenti Nursultan Nazarbaev jańadan saılanǵan Senat depýtattarynyń aldaǵy sapaly jumysyna senim bildirdi.

«Qurmetti depýtattar, barshańyzdy jańa parlamenttik maýsymnyń bastalýymen shyn júregimnen quttyqtaımyn! Osy arada eldi aralap, halyqtyń aldynda sóılep, kóp jumys jasadyńyzdar. Endi jańa kúshpen ári oımen, jańa sesıany bastaǵaly otyrmyz. Ózderińiz bilesizder, 28 maýsymda Senat depýtattarynyń saılaýy ótip, Parlamenttiń joǵary palatasynyń quramy Konstıtýsıa boıynsha jańardy. Atap aıtqanda, barlyq óńirlerde saılaý ótti, aldymyzdaǵy alty jyldyń ishinde olar sol senimdi aqtap, halyqqa qyzmet etetin bolady. Sondyqtan jańadan saılanǵan halyq qalaýlylaryn qyzmetterimen quttyqtap, tabys tileıik», - dedi QR Prezıdenti.

Memleket basshysy bıyl Qazaqstanda jańǵyrýdyń jańa kókjıekteri ashylyp, irgeli úderisterdi júıeli túrde iske asyrý bastalǵanyn atap ótti.

«Jańǵyrý úrdisi negizgi úsh sala: ekonomıkalyq, saıası jáne rýhanı baǵyttar boıynsha órbýde. Árbir memleket osy úsh máseleni nazarda ustap, órkendeıtin bolady. Bul reformanyń negizinde biz «Qazaqstan-2050» strategıasyndaǵy maqsattarymyzǵa jetemiz. Túpki maqsatymyz - otyz órkendep ósken eldiń arasynda bolý», - dedi N. Nazarbaev.