21 qyrkúıekte Amerıka Qurama Shtattarynyń bastamasy boıynsha BUU Qaýipsizdik Keńesi jappaı qyryp-joıý qarýyn taratpaý jáne olardy jetkizý júıelerin taratý qaýpi taqyryby boıynsha mınıstrler deńgeıinde kezdesý ótti, dep jazady Qamshy.kz aqparat agenttigi.
Kún tártibinde BUU Qaýipsizdik Keńesiniń qarý-jaraqtyń taratylýyn boldyrmaý týraly sheshimderin qoldaný joldaryn talqylaý boldy.
AQSH Memlekettik hatshysy Reks Tılerson óziniń aýqymdy baıandamasynda jahandyq qarýsyzdaný men taratpaý úderisindegi Qazaqstannyń róline bólek nazar aýdardy. Atap aıtqanda, ol ıadrolyq qarýdan bas tartqan elimiz danalyqtyń aıryqsha úlgisi bolyp tabylatynyn atap ótti. Qazaqstan burynǵy keńestik qarýlardy jáne ıadrolyq tehnologıalardy óz aýmaǵynan alyp tastady jáne ıadrolyq emes memleket retinde Iadrolyq qarýdy taratpaý týraly shartqa qosyldy.
Qazaqstan basshylyǵynyń batyl sheshimi ıadrolyq qarýdyń, onyń quramdas bólikteriniń, ıadrolyq materıaldardyń jáne qos maqsatty tehnologıalardyń zıankesterdiń qolyna túsý qaýpin edáýir qysqartty dep R. Tılerson atap ótti. Onyń pikirinshe, ıadrolyq qarý basqa eldermen qarym-qatynastardy qıyndatyp, esepten jańylysý, apattar nemese taratý qaýpin týdyrady.
Memlekettik hatshy Qazaqstannyń áreketi eldi halyqtar qaýymdastyǵyna tartý úderisinde mańyzdy qadam boldy dep atap ótti. Iadrolyq qarýdan qutylýdyń nátıjesinde álem Qazaqstandy ıadrolyq agresorǵa aınalýy múmkin «alastatylǵan» memleket retinde qarastyrmaıdy. Ol óziniń ıadrolyq kórshileri – Reseı men Qytaıdyń dushpanyna da aınalǵan joq.
«Búgin Qazaqstan kórshilerimen tatý-beıbit ómir súrýde. Ol berik saýda qatynastaryn damytýda. Bıyl elimizde EKSPO-2017 halyqaralyq mamandandyrylǵan kórmesi ótip, ol bolashaqtyń energıa kózderin jáne búkil álemniń qatysýshylaryna Qazaqstannyń ınvestısıalyq múmkindikterin kórsetti. Bul óńirlik jáne halyqaralyq beıbitshilik pen órkendeýge eleýli úles qosyp otyrǵan zamanaýı memleket. Qazaqstan óziniń sheshiminen tek paıda kórdi»,- dedi ol.
«Burynǵy kásibı qyzmetimde Prezıdent Nursultan Nazarbaevpen birneshe ret kezdestim jáne oǵan osy sheshim týraly suraq qoıýma múmkindik boldy. Ol maǵan bul sheshimge eshqashan ókinbeıtinin jáne kúnderdiń birinde bul joba jas elimiz úshin jasaǵan eń zor jaqsylyǵy ekenin aıtqan», - dedi R. Tılerson.
Syrtqy ister mınıstri Qaırat Ábdirahmanov óz sózinde AQSH Memlekettik hatshysyna bizdiń elimizge jáne Prezıdent N. Nazarbaevqa joldaǵan jyly lebizderi úshin alǵysyn bildirdi. Mınıstr qatysýshylardy AEHA tómen baıytylǵan ýran bankiniń ashylý kezinde jarıalanǵan Elbasynyń bastamalardan habardar etti, sondaı-aq halyqaralyq qarýsyzdaný jáne taratpaýdyń negizgi aspektileri boıynsha Qazaqstannyń ustanymyna egjeı-tegjeıli toqtaldy.
