Qyrǵyzstan prezıdenti Almazbek Atambaev aldaǵy ótpek prezıdenttik saılaýdyń Qyrǵyzstan úshin tarıhı mańyzy zor ekenin, sondaı-aq memlekettiń turaqtylyǵyn nyǵaıtyp, odan ári saqtap qalýǵa septigin tıgizetin úlken qadam ekenin aıtty, dep jazady Qamshy.kz aqparat agenttigi.

Onyń aıtýynsha, taza ári ádil saılaý ótkizý asa mańyzdy, sebebi el arasynda saılaý nátıjelerine qatysty esh kúmán bolmaý kerek. Bul týraly el basshysy vıse-premer-mınıstr Temir Jumaqadyrov jáne Ortalyq atqarý komıtetiniń tóraǵasy Nurjan Shaıldabekovany qabyldaǵanda aıtqan, dep habarlaıdy prezıdent apparaty.

Qyrǵyzstanda kezekti prezıdent saılaýy 15 qazanda ótedi. Almazbek Atambaevtyń ókilettelik merzimi 1 jeltoqsanda aıaqtalady.

Aıta keteıik, Qazaqstan prezıdenti Nursultan Nazarbaev 19 qyrkúıekte Qyrǵyzstan prezıdenttigine úmitker Ómirbek Babanovpen Almatyda kezdesken.

Kezdesý barysynda ekijaqty yntymaqtastyqty odan ári nyǵaıtý máseleleri talqylanǵan.

Elbasy Qyrǵyzstannyń prezıdentterimen jaqsy qarym-qatynasta bolǵandyǵyn, qyrǵyz halqy senim bildirip, jańadan saılaıtyn prezıdentpen de tıimdi is-qımyl qalyptastyratynyn málim etken.  

Óz kezeginde Qyrǵyzstan bıligi Nazarbaevtyń Ómirbek Babanovpen kezdeskenine narazy ekendigin bildirdi. Qyrǵyz tarapy atalmysh kezdesýdi Qazaqstannyń Qyrǵyzstanda ótpek prezıdenttik saılaýyna qandaı da bir áser qaldyrý qadamyna balap, eldiń ishki saıasatyna aralasý dep sanady.